بركان من الجمال ( شعر غنائي )

بركان من الجمال

في منتهى الغرابة 

الرقة و الحنان

السحر و الطيابة

عاشق انا هيمان

انا المغرم صبابة !

.............

.............

ياللى الهوى انتي

وف قلب روحي سكنتي

دي القسمة و المكتوب

اسهر و قلبي يدوب

في العشق و المحبوب

ويختارك حبيبتي 

بركان من الجمال

في منتهى الغرابة 

الرقة و الحنان

السحر و الطيابة

عاشق انا هيمان

انا المغرم صبابة !

...........

............

ياللى الجمال انتي

وياللى الغرام انتي

لو طال بينا البعاد

فرّق ما بينّا بلاد

حاتكونى انتى المعاد

ومافيش غيرك حبيبتي 

بركان من الجمال
في منتهى الغرابة 
الرقة و الحنان
السحر و الطيابة
عاشق انا هيمان
انا المغرم صبابة !

.............

عادل حجازي

1/9/1997

مغرمة بيكي عيوني ( شعر غنائي )

مغرمة بيكي عيوني

مغرمة بيكي الناس

انتي يا ضي عيوني

انتي يا أغلى الناس

مغرم بيكي و قلبي

موش ممكن هايخبي

على قلبك احساسه

وهواه الجنوني

مغرمة بيكي عيوني

مغرمة بيكي الناس .

.........

..........

مغرمة بيكي مشاعري

والكون و اللى فيه

انتي يا شمسي و قمري

ما تميلي و شوفيه

مغرمة بيكي عيوني

مغرمة بيكي الناس

انتي يا ضي عيوني

انتي يا أغلى الناس

..........

..........

مغرمة بيكي سنيني

و ايام الزمان

و يزيد بيا حنيني

يا بحر الحنان

مغرمة بيكي عيوني
مغرمة بيكي الناس
انتي يا ضي عيوني
انتي يا أغلى الناس

..........

عادل حجازي

26-9-1996

شىء غامض ( شعر غنائي )

شىء غامض غريب

بيشدّني ناحيتك

بيخلّيني أدوب

ادوب فى محبتك

قلبك ولّا..رقتك 

سحرك ولّا ..نظرتك

صوتك ولّا ضحكتك

ولّا ايه ..ولّا ايه..ايه !

ايه اللى شاددني ناحيتك !

.............

............

من أول ما اتقابلنا

ونا و عيني حلمنا

ان هواكي الجميل

في حياتنا يقاسمنا 

قلبك ولّا..رقتك 

سحرك ولّا ..نظرتك

صوتك ولّا ضحكتك

ولّا ايه ..ولّا ايه..ايه !

ايه اللى شاددني ناحيتك !

..............

..............

مشوار عمري رسمته

فى عيون اللى عشقته

وادّيته كل روحي

وليل الشوق سهرته 

قلبك ولّا..رقتك 

سحرك ولّا ..نظرتك

صوتك ولّا ضحكتك

ولّا ايه ..ولّا ايه..ايه !

ايه اللى شاددني ناحيتك !

.............

عادل حجازي

18-10-1998

موش حانتقم ( شعر غنائي )

موش حانتقم  من غدر..

قلبك ويّايا ..موش حانتقم

والجراح..الغالية بكره

حاتلتئم ..موش حانتقم

كل اللى حاقدر اعمله

حامشي ف طريقي و اكمله

من غير هوى ومن غير بكا

والبُعد...آه...هاستحمله

موش حانتقم .

.......

.......

حايفيد بايه انتقامي

حايفيد بايه دمع العيون

ضاعت مشاعري و أحلامي

وخلاص قدر قلبك يخون

كل اللى حاقدر اعمله

حامشي ف طريقي و اكمله

من غير هوى ومن غير بكا

والبُعد...آه...هاستحمله

موش حانتقم .

.......

......

بكره الليالي ف بعادي

حاتبقى شىء صعب و حزين

من غير هوايا و فؤادي

هاتعيش فى نار جرح و أنين

كل اللى حاقدر اعمله
حامشي ف طريقي و اكمله
من غير هوى ومن غير بكا
والبُعد...آه...هاستحمله
موش حانتقم .

موش حانتقم  من غدر..
قلبك ويّايا ..موش حانتقم
والجراح..الغالية بكره
حاتلتئم ..موش حانتقم

..........

عادل حجازي

4/4/1995

ظلمتك معايا ( شعر غنائي )

ظلمتك معايا..ظلمتك كتير

يا أطيب صديقة قابلتني ف حياتي

ظلمتك معايا..ظلمتك كتير

ونا فى الحقيقة بتعذّب ليلاتي

ظلمتك معايا..ظلمتك كتير

............

كان قلبى م البداية

لازم يوضع نهاية

ويصارحك بالحقيقة

وبإنّك موش هوايا

لكن كان غصب عنّي

خبّيت  عنّك  لأني

مقدرش أشوف دموعك

واتحمّل فرقتك

ظلمتك معايا..ظلمتك كتير

...........

كنتى بالنسبة ليا 

معنى الصحبة الوفية 

ومعاني كتير رقيقة

غالية فعلا عليا

ارجوكي سامحي قلبي

ماتحسسنيش بذنبي

مقدرش أشوف دموعك

واتحمّل فرقتك

ظلمتك معايا..ظلمتك كتير

................

عادل حجازي

15-10-1996

الجمال الهادي ( شعر غنائي )

الجمال الهادي

كل يوم بينادي

كل يوم يسحرني أكتر

كل يوم يشغلني اكتر

وألاقيني باحلم وافكر

في قمرة قلبي و بلادي

الجمال الهادي .

........

العيون الحالمة 

خلّت حالي حال

رايحة جاية..سالمة

بالحُسن الموّال 

ياللى كل ما فيكي ساحر

والجمال  مالهش   آخر

الجمال الهادي .

.............

البراءة المذهلة

المشاعر و الأمان

اشتياقي مشكلة

حلّها نظرة حنان

ياللى كل ما فيكي ساحر

والجمال  مالهش   آخر

الجمال الهادي .

...........

عادل حجازي

7/4/1999

احساس ماهوّاش سهل ( شعر غنائي )

احساس ماهوّاش سهل

انّك..و بكل...جهل

تدوس على أقرب ناس

كانت عايشة عشانك 

وبعد ..فوات...الوقت

تندم..انك..حرقت

اللى ما بينك و بينهم

ازاى احساسك خانك

هيّ كده الدنيا قرار

يا إمّا جنة يا إما نار

وحنا أسأنا الاختيار

و آدينا بندفع التمن 

ضيّعنا ليه أجمل غرام

وقلب كان فوق الكلام

دلوقت جيّ تقول حرام

من بعد ما دار الزمن 

احساس ماهوّاش سهل .

.....................

......................

و نمشي طريق الحياة

لا نسينا و لا هاننساه

واللى بنتمنــــــــــــاه
المستحيل يحصل 


اسمع صوته ينادي
وألاقيه من تاني قصادي
و بعد غياب موش عادي
أنا شوقي ليه يوصل 


يا طريق طال بالعذاب
خلاص انا قلبي داب
وتعبت من الغياب
وموش قادر أكمّل

ايام دايرة و بتفوت
ونا عايش بس باموت
وكلامي زي السكوت 
وميــن هايتحمّل 

هيّ كده الدنيا قرار

يا إمّا جنة يا إما نار

وحنا أسأنا الاختيار

و آدينا بندفع التمن 

ضيّعنا ليه أجمل غرام

وقلب كان فوق الكلام

دلوقت جيّ تقول حرام

من بعد ما دار الزمن 

احساس ماهوّاش سهل .

...........

عادل حجازي
1/1/1999

هوضع حدّ لظلمك ( شعر غنائي )

هوضع حدّ لظلمك

وهاحطّم تعاليكي

حانسى هوايا وحلمك

وهاسهّر لياليكي

راح اخلّي غرورك...أحزان

على فُرقة قلبي..الإنسان

 و هواكي  دا كأنّه  ما كان

وموش حاندم عليكي !!

.........

.........

أنا هابعد عنّك يمكن

قلبك يعرف حجمه 

هاتحمل انا موش ممكن

كل غروره و وهمه 

راح اخلّي غرورك...أحزان

على فُرقة قلبي..الإنسان

 و هواكي  دا كأنّه  ما كان

وموش حاندم عليكي !!

..........

..........

انا بيكي ..ومن غيرك

أقدر اعيش و أكون 

عمري ما كنت اسيرك

ولا حاقبل مهما يكون 

راح اخلّي غرورك...أحزان
على فُرقة قلبي..الإنسان
 و هواكي  دا كأنّه  ما كان
وموش حاندم عليكي !!

هوضع حدّ لظلمك
وهاحطّم تعاليكي
حانسى هوايا وحلمك
وهاسهّر لياليكي 

..........
عادل حجازي
4/11/1996

هاتحرر من سجونك ! ( شعر غنائي )

هاتحرر من سجونك

هاتحرر من شجونك

هاتحرر من جنونك

لحد كده...وكفاية 

ملّيت أعذر و أسامح

ملّيت تجرح و أصالح

غدّار  قلبك  و  جارح

و دي نهاية الحكاية 

خلاص يا حبيبي خلاص

وصلنا للنهاية .

.........

ياما سامحت فى حقّي

وكتير اتنازلت

ونت بتجرح قلبي

جرحته و مازلت

غدّار  قلبك  و  جارح

و دي نهاية الحكاية 

خلاص يا حبيبي خلاص

وصلنا للنهاية .

............

ياما جرحت مشاعري

بدال المرّة ألف

من غيرك أنا حرّة 

م الجرح و م الضعف

غدّار  قلبك  و  جارح

و دي نهاية الحكاية 

خلاص يا حبيبي خلاص

وصلنا للنهاية .

هاتحرر من سجونك

هاتحرر من شجونك

هاتحرر من جنونك

لحد كده...وكفاية 

ملّيت أعذر و أسامح

ملّيت تجرح و أصالح

غدّار  قلبك  و  جارح

و دي نهاية الحكاية 

خلاص يا حبيبي خلاص

وصلنا للنهاية .

..........

عادل حجازى

11-9-1997

أصغر قوي من أحلامي ( شعر غنائي )

أصغر قوي من أحلامي

أصغر من حجم عواطفي

أصغر بكتير...كتير 

حبك كان من أوهامي

حبك كان شىء من ضعفي

كان وهم كبير...كبير 

ونا بندم على إني صادفتك

و ف يوم من أيامي عرفتك

وبحاول أنسى ان انا شفتك

أو حتى لمحتك قدّامي !!

..........

..........

ويّاك أنا قلبي بدأ يعشق

و هواك قصة حبي الأولى 

 و لقيته بأحلامه بيغرق

مع قلب بيجرح بسهولة 

ونا بندم على إني صادفتك

و ف يوم من أيامي عرفتك

وبحاول أنسى ان انا شفتك

أو حتى لمحتك قدّامي !!

..........

ويّاك أنا قلبي عرف معنى

الويل وجراحه نيران قايدة

وخلاص لانا هاعشق واتمنى

ومشاعرى معاك من غير فايدة

ونا بندم على إني صادفتك

و ف يوم من أيامي عرفتك

وبحاول أنسى ان انا شفتك

أو حتى لمحتك قدّامي !!

أصغر قوي من أحلامي

أصغر من حجم عواطفي

أصغر بكتير...كتير 

حبك كان من أوهامي

حبك كان شىء من ضعفي

كان وهم كبير...كبير 

............

عادل حجازي

15-2-1997