عادل حجازى

كل يوم عن يوم بحبك كل ساعة و كل ثانية والعيون دابت ف حبّك و ف غرامك دنيا تانية  دنيا كلها م الأحلام دنيا كلها م الأنغام دنيا ما تعرف أوهام كل يوم عن يوم بحبك . .......... .......... ياللى القمر بيغير منّك انتي اللى قلبي اختار قلبك ومهما يوم يحصل منّك انا برضو عاشقك و بحبك دنتى الهوي ..اللى مافيش زيّه ونتي القمر..فى جميل ضيّه كل يوم عن يوم بحبك . ............ ........... أنا و السهر عاشقين سحرك بندوب فى سيرتك و مشاعرك القلب يسهر على صورتك والليل ف عيني لون شعرك  دنتى الهوي ..اللى مافيش زيّه ونتي القمر..فى جميل ضيّه كل يوم عن يوم بحبك . ......... عادل حجازي 13-4-1996

الطيبة الغريبة ..والعين الحبيبة..و الشوقة الرهيبة بتحلم بقربك ! النظرة البريئة ...والهمسة الرقيقة..خلوني الحقيقة اسلّم و احبك ! ....... ........ عندي كلام كتير فى الحب و الأشواق بس الكلام أسير للحرف و الأوراق وعشان كده دا مُحال ف كلام غنا ينقال أو كلمة أو مرسال أوصفلك ..كل حبى ! الطيبة الغريبة ..والعين الحبيبة..و الشوقة الرهيبة بتحلم بقربك ! النظرة البريئة ...والهمسة الرقيقة..خلوني الحقيقة اسلّم و احبك ! ...... ....... الحب اللى ف قلبي  بيفوق الخيال و قلبك مع قلبي دا الخير و الجمال ايام ورا ايام و غرامنا م الأحلام ألقى فين الكلام يوصفلك ..كل حبي ! الطيبة الغريبة ..والعين الحبيبة..و الشوقة الرهيبة بتحلم بقربك ! النظرة البريئة ...والهمسة الرقيقة..خلوني الحقيقة اسلّم و احبك ! ......... عادل حجازي 24-3-1996

وما يمنعش .. رغم القبر..و رغم النعش  رغم صلاتى عليكى فى وسط الناس رغم الروح المتزلزلة احساس لما قالولى ..اجمد...وخلاص اصل الرايح.....ما بيرجعش بس انا شايفك لسه قصادي رقمك على تليفونى ..وعادى صوتك ما سمعتوش الصُبح جايز مشغولة المرّة دي بكره ...بعده ...زيّ الرمح أنا صُلب ...حديد ...اصل انا عارفك ما تحبّيش الحال المايع والدلع البايخ ع الفاضى طَب انا راضى هافضل صابر...ما اتمَلْعَنش ! وما يمنعش .. رغم القبر..و رغم النعش ان الباب ...مستنى الخبطة وان واحشنى بجد ...الربطة وحشاني اللمّة  السهرانة بضحكة قلب.. مظبوطة ...ظبطة ونا عارف كام يوم وهاتيجي اصلك عمر ما شلتيلى غلطة ونا لو كنت بجد حبيبك يبقى تسامحى تبوسى ملامحى تاخدينى ف حضنك للصُبح انا ميّت م الشوق ...والجرح طعم السكر اصبح ملح ...ومافيش فرْح ونا عينى على صورتك ...ثابتة ما بتدّمعش رغم القبر.....و رغم النعش . ونا عينى على صورتك ...ثابتة ما بتدّمعش رغم القبر.....و رغم النعش . ........................... عادل حجازى 27-8-2014

افرض مُت ّ ؟!  .......... افرض مُتّ   وجالك خبرى عادى نهاية عمرى   وقدرى يعني هاتبكي عليّا شويّة   و تمشى جنازتى    هاتصلى وتدعيلي شوية   وبعد ما تدفن ...كام كلمة على سلام و... تُكُتّ ! يرحم ايامه ولياليه   كان غالى و كان عالى فى قلبى   بس ساعات كَتْ منّه تُشُط ّ   كان طيّب ..يغفر له ذنوبه ..ومكانش يحب الباراشوت ! ياخد حاجة ماهيّاش حقّه   و عشان كده اتّاكل.. حقّه   وياما حاولت بجد ....ازُقّه   ياما كلّمته وياما وعّيته   ولمّا زهق من رغيي ...سُكُتّ ! يا صاحبى اترحّم و ادعيلى   يعني انا مُتّ.. ونت هاتعمل بطل الفيلم ؟! خلص الفيلم   لمّوا الحاجة وما تخلّوش ولا اى سبوتّ   طفّى الدنيا   و رُوح ...سلامات   آخر لقطة زووم فى الكاميرا ...و آخر....شوتّ !! ..... عادل حجازى   26-8-2014

الحقيقة ..بدون مجاملة قلبي عاشق من مقابلة ولو تشوفك روحي قابلة يبقى أسعد قلب..قلبي ده ابتدت ..ايامي تفرح وابتدت...احلامي تطرح والعيون تسهر و تسرح أصلك انتى حقيقي هايلة ! .......... .......... موش بجاملك..لمّا اقولّك انتى أجمل م الجمال ياللى حبّك..خلّى قُربك سحر بيعدّي الخيال ده ابتدت ..ايامي تفرح وابتدت...احلامي تطرح والعيون تسهر و تسرح أصلك انتى حقيقي هايلة ! .......... .......... قلبي طاوعك..ماهو بايعك مهما شاف منّك عذاب موش هافارقك..عمري عاشقك قصاد عيوني..وف الغياب ده ابتدت ..ايامي تفرح وابتدت...احلامي تطرح والعيون تسهر و تسرح أصلك انتى حقيقي هايلة ! ............... عادل حجازي 15/1/1996

في المزاد ..على قلبك كنت واقف بين ألوف في المزاد ..على حبك اتمليت رعب و خوف كنت ميت م النهاية وكنت ميت م الكسوف  وابتدا...العدّ يبدأ  مين هايكسب مين هايسبق مين فى أخر الفيلم يسرق  حلم موش قد الظروف ! رحتى منى و كنت عارف انك انتى اكيد لغيري اتحققت كل المخاوف والفراق أصبح مصيري في المزاد ..على قلبك ! في المزاد . .......... ........... مين اشترى و بكام  وازاى بقيتي رخام وازاى محسّش قلبك  ولا حتى لحظة ندم .. لمّا التقاني ف حبك باغرق ف بحر الألم رحتى منى و كنت عارف انك انتى اكيد لغيري اتحققت كل المخاوف والفراق أصبح مصيري في المزاد ..على قلبك ! في المزاد . ........ ........ مين ضيّع الأحلام و ازاي بقت أوهام ازاي هان الغرام و كأنه شيء م العدم ازاى هان الغرام  على قلبك انتى الصنم  رحتى منى و كنت عارف انك انتى اكيد لغيري اتحققت كل المخاوف والفراق أصبح مصيري في المزاد ..على قلبك ! في المزاد . ........... ........... عادل حجازي 2/5/1995

سلّمت ..و يدوب سلام سلّمت ..عيني بهيام والتقيتنى..و التقيتها ف الهوى من غير كلام  ......... ......... مش غريبة و مش عجيبة ان قلبي اختار هواكي يا حبيبة و يا قريبة كل عمرى اكيد معاكي دتني ويّايا ف حلمي فرحي و غنايا و نجمي كل حبي ..و كل قلبي  حتى روحي....سلّمت  سلّمت ..و يدوب سلام سلّمت ..عيني بهيام والتقيتنى..و التقيتها ف الهوى من غير كلام ! ........ ......... مش بعيدة و مش عنيدة العيون عايشة ف خيالي الرقيقة...و البريئة ضيّهم  قمر الليالي دنتى أيّامي و شوقي ونتى احلامي و شروقي كل حبي ..و كل قلبي  حتى روحي....سلّمت  سلّمت ..و يدوب سلام سلّمت ..عيني بهيام والتقيتنى..و التقيتها ف الهوى من غير كلام ! .......... .......... عادل حجازي 5-2-1996

بحبك ...ونتي موش ليّه  و مقسومة لحبيب تاني وصورتك لسّه في عنيّا ومرسومة فى وجداني  عملنا كل ما يُمكن عشان ننساكي ما قدرنا أنا و قلبي دا مش ممكن  وحبك دم فى عروقنا  حبيبة و حبك اتمكّن ومش ممكن حايهجرنا . بحبك ...ونتي موش ليّه  و مقسومة لحبيب تاني .......... .......... عارف ..إنها أوهام اشوفك راجعة بهواكي باصبّر قلبي بالاحلام عشان مقدرش أنساكي عملنا كل ما يُمكن عشان ننساكي ما قدرنا أنا و قلبي دا مش ممكن  وحبك دم فى عروقنا  حبيبة و حبك اتمكّن ومش ممكن حايهجرنا . بحبك ...ونتي موش ليّه  و مقسومة لحبيب تاني ........... ........... جايز ..ابقى موش غلطان لمّا باعيش فى احلامك ما يمكن تنتهى الاحزان و ترجع تاني ايامك  عملنا كل ما يُمكن عشان ننساكي ما قدرنا أنا و قلبي دا مش ممكن  وحبك دم فى عروقنا  حبيبة و حبك اتمكّن ومش ممكن حايهجرنا . بحبك ...ونتي موش ليّه  و مقسومة لحبيب تاني ....... ....... عادل حجازي 3-1998

زي زمان ..عايزك حبيبي ترجع تعشق زي زمان ونعيش عمرنا كله سعادة ونشوف حبنا كل مكان  مش حرام ..نبعد وننسى  والغرام ..ف القلب لسه لسه قلبي أكيد بيعشق ولسه حبك...زي زمان . ......... ......... خدنا ايه ..م البُعْد ليالي غير عذابنا وغير آلامنا  مانت عارف ايه جرالي من بعادنا و من فراقنا مش حرام ..نبعد وننسى  والغرام ..ف القلب لسه لسه قلبي أكيد بيعشق ولسه حبك...زي زمان . .......... .......... قد ايه شفتك حبيبي وقد ايه الشوق دا طال بي تنسى ليه و تزيد لهيبي  ونت روحي ..ونت قلبى مش حرام ..نبعد وننسى  والغرام ..ف القلب لسه لسه قلبي أكيد بيعشق ولسه حبك...زي زمان . ........ ........ عادل حجازي 19/10/1995

أنا ممكن أحبّك...آه و أعشق و أكونلك ..آه ولا عمري أقول ال..آه لو يوم تنوي الفراق دنا غير..كل اللى عرفك ونا غير..كل اللى صادفك هاقدر اسيبك وعمري  ما تهمني الأشواق ! ......... ......... لو فاكرة إنّي أسيرك تبقي رحتي لبعيد ومسيرك يوم مسيرك هاتشوفي ندم أكيد لما أبعد عن حياتك و أزوّد نار آهاتك وتزيد النار ف بُعدي جوّه القلب العنيد ! أنا ممكن أحبّك...آه و أعشق و أكونلك ..آه ولا عمري أقول ال..آه لو يوم تنوي الفراق ......... ......... انا عشت سنين حبيبك وليالي احلم و ادوب و رجعت و اقول هاسيبك دا نصيب لنا و مكتوب واتحمّل ليه غرورك من اول يوم ظهورك آهي ذكري و يوم تعدّي و ننسى الهوى المحبوب  أنا ممكن أحبّك...آه و أعشق و أكونلك ..آه ولا عمري أقول ال..آه لو يوم تنوي الفراق دنا غير..كل اللى عرفك ونا غير..كل اللى صادفك هاقدر اسيبك وعمري  ما تهمني الأشواق ! .......... .......... عادل حجازي 10-10-1995

دلوقتي بس..جيت و افتكرت قد ايه حبيتك ؟! طب ليه ما حس..قلبك فى وقت لمّا روحي ناديتك  كل دا ..فات و انتهى حكاية ..عدّى وقتها  واللى قصاد عيونك واحدة غير اللى انت عرفتها  !! .......... .......... يعني تبعد..سنين و تقدر و كنت فاكر لسّه ليك ؟! ازاى كده ..عقلك يفكر ايه الغرور اللى ماليك ؟! انسى انى حتى افكر انا مستحيلة هافكر  فيك !! كل دا ..فات و انتهى حكاية ..عدّى وقتها  واللى قصاد عيونك واحدة غير اللى انت عرفتها  !! ......... ......... هوّ ايه ...مشاعرنا لعبة  والدنيا ماشية على هواك  تسيب قلوب العمر كله وتقول مسيرها هاتستناك عايش فى وهم مالوش نهاية والناس بشر..وماهيش ملاك  كل دا ..فات و انتهى حكاية ..عدّى وقتها  واللى قصاد عيونك واحدة غير اللى انت عرفتها  !! دلوقتي بس..جيت و افتكرت قد ايه حبيتك ؟! طب ليه ما حس..قلبك فى وقت لمّا روحي ناديتك  كل دا ..فات و انتهى حكاية ..عدّى وقتها  واللى قصاد عيونك واحدة غير اللى انت عرفتها  !! ........... .......... عادل حجازى 1995

من أوّل و جديد هانبدأ أيامنا  يا حبيبي سوا من أوّل و جديد هانرسم احلامنا  ونطير ف الهوي ونغنّي مع الأشواق ونعيش أجمل عشاق ما أنت هواك يا حبيبي كان أجمل لُقى . من أوّل و جديد .......... .......... عشت سنين أنا قبلك في عذاب اللى كان  ولمّا القلب دا قابلك حسّيت بالأمان ما أنت هواك يا حبيبي كان أجمل لُقى . من أوّل و جديد هانبدأ أيامنا  يا حبيبي سوا من أوّل و جديد هانرسم احلامنا  ونطير ف الهوي ونغنّي مع الأشواق ونعيش أجمل عشاق ما أنت هواك يا حبيبي كان أجمل لُقى . من أوّل و جديد .......... .......... طول أيّامي بحبك آه يا نبع الحنان ياللى ساحرني بقلبك على طول الزمان  ما أنت هواك يا حبيبي كان أجمل لُقى . من أوّل و جديد هانبدأ أيامنا  يا حبيبي سوا من أوّل و جديد هانرسم احلامنا  ونطير ف الهوي ونغنّي مع الأشواق ونعيش أجمل عشاق ما أنت هواك يا حبيبي كان أجمل لُقى . من أوّل و جديد ........ ......... عادل حجازي 18-10-1995

كمان ابتسم ...كمان اترسم ف قلبي و خيالي يا أجمل ملاك  يا حبي و يا حياتي و يا عمري اللى آتي يا بلسم آهاتي..هواك اتحسم ! ......... ......... حقيقي ابتسامتك غير أي ابتسام و زايدة ف وسامتك جمال و انسجام كمان يا حبيبي كمان ابتسم ! كمان ابتسم ...كمان اترسم ف قلبي و خيالي يا أجمل ملاك  يا حبي و يا حياتي و يا عمري اللى آتي يا بلسم آهاتي..هواك اتحسم ! ........ ........ عيونك و قلبك  دول فوق الكلام  بحبك ..بحبك يا بدر التمام كمان يا حبيبي كمان ابتسم ! كمان ابتسم ...كمان اترسم ف قلبي و خيالي يا أجمل ملاك  يا حبي و يا حياتي و يا عمري اللى آتي يا بلسم آهاتي..هواك اتحسم ! .......... .......... عادل حجازي 13-10-1995

تعالى...قول عتابك بس ما تسيبنيش تعالي..فين كلامك ليه ما تسمعنيش يمكن تكون ظالمني ياللى بعادك آلمني يمكن ما تعرفنيش !! تعالى...قول عتابك بس ما تسيبنيش ......... ......... اسمع ...اسمع كلامي وساعتها احكم عليا  قبل ما تعلن فراقي قبل ما تجرح عنيا قبل ما نبعد نهائي والشوق يروح ما يجيش تعالى...قول عتابك بس ما تسيبنيش تعالي..فين كلامك ليه ما تسمعنيش يمكن تكون ظالمني ياللى بعادك آلمني يمكن ما تعرفنيش !! تعالى...قول عتابك بس ما تسيبنيش ......... ......... ليه لما ..الشوق ناداني اخترت انك تغيب  ونسيت اجمل معاني ونسيت اخلص حبيب ونسيت مين كان ف حبك بيموت علشان تعيش  تعالى...قول عتابك بس ما تسيبنيش تعالي..فين كلامك ليه ما تسمعنيش يمكن تكون ظالمني ياللى بعادك آلمني يمكن ما تعرفنيش !! تعالى...قول عتابك بس ما تسيبنيش ......... ........ عادل حجازي 23-7-1995

بطّلت احبّ حدّ من كُتْر ما قلبي شاف  وخلاص من كل حاجة  بقيت باهرب و اخاف  عايش باجري فى غابة  من ناس زيّ الديابة  ومافيش مكان للغلابة  الكل جايبك كِتاف !! الفرح زيّ الكآبة  مالهاش وصف بكتابة  والعمر زى السحابة  مخطوف منّا اختطاف !! بطّلت احبّ حدّ . ........... مافيش شكرا ولا تقدير ولا رحمة و حنيّة مُحاطْ بالغدر و التقصير وبالشك و سوء النيّة  عايش باجري فى غابة  من ناس زيّ الديابة  ومافيش مكان للغلابة  الكل جايبك كِتاف !! الفرح زيّ الكآبة  مالهاش وصف بكتابة  والعمر زى السحابة  مخطوف منّا اختطاف !! بطّلت احبّ حدّ . ............... عادل حجازى . 3-8-2014

مفيهاش كلام..أجمل ملاك عايشة هنا ف قلبي مفيهاش كلام..أجمل ملاك حبّك  هوى  عمري مانتي الطريق ..اللى هويته ونتى الحبيب..اللى ناديته ونتى الهوى و قمري . ........ ........ أوّل ما شفتك ..حبيتك و اخترت قلبك..وناديتك وقلتلك قلبي دا بيتك هاتعيشي فيه وهايحميكي اول ما لمست ..أحلامي  طعم لحياتها ف ايامى  كان لما شفتك قدامي  وحضنت عنيا ..عينكي  مفيهاش كلام..أجمل ملاك عايشة هنا ف قلبي مفيهاش كلام..أجمل ملاك حبّك  هوى  عمري مانتي الطريق ..اللى هويته ونتى الحبيب..اللى ناديته ونتى الهوى و قمري . ....... .......... عادل حجازي 2-8-1995