دلوقتي بس ؟! ( شعر غنائي )
دلوقتي بس..جيت و افتكرت
قد ايه حبيتك ؟!
طب ليه ما حس..قلبك فى وقت
لمّا روحي ناديتك
كل دا ..فات و انتهى
حكاية ..عدّى وقتها
واللى قصاد عيونك واحدة
غير اللى انت عرفتها !!
..........
..........
يعني تبعد..سنين و تقدر
و كنت فاكر لسّه ليك ؟!
ازاى كده ..عقلك يفكر
ايه الغرور اللى ماليك ؟!
انسى انى حتى افكر
انا مستحيلة هافكر فيك !!
كل دا ..فات و انتهى
حكاية ..عدّى وقتها
واللى قصاد عيونك واحدة
غير اللى انت عرفتها !!
.........
.........
هوّ ايه ...مشاعرنا لعبة
والدنيا ماشية على هواك
تسيب قلوب العمر كله
وتقول مسيرها هاتستناك
عايش فى وهم مالوش نهاية
والناس بشر..وماهيش ملاك
كل دا ..فات و انتهى
حكاية ..عدّى وقتها
واللى قصاد عيونك واحدة
غير اللى انت عرفتها !!
دلوقتي بس..جيت و افتكرت
قد ايه حبيتك ؟!
طب ليه ما حس..قلبك فى وقت
لمّا روحي ناديتك
كل دا ..فات و انتهى
حكاية ..عدّى وقتها
واللى قصاد عيونك واحدة
غير اللى انت عرفتها !!
...........
..........
عادل حجازى
1995
تعليقات
إرسال تعليق