لحية و كاب ( قصيدة عامّية )
لحية و كاب
كتبوا كتاب
دخلوا العزبة
وقفلوا الباب
مين كان حاضر
مين كان غاب
قسموا القسمة
ما عملوا حساب
غير للّ احباب
وال انساب
والنهر انساب
ولافيش حاجة للّ اغراب
حط ّ غراب
فوق العزبة نَعَق بخراب
قال : القسمة
ماهيش مقسومة
والعزبادي ماهيش محسومة
ردّوا وقالوا : يا وشّ البومة
اقرا اليافطة
" شريعة الغاب " !!
لحية و كاب
كتبوا كتاب
دخلوا العزبة
وقفلوا الباب !!
لحية وكاب
كانوا أصحاب
يوم ما اتفقوا
وقالوا كفاية
فستك يالله عليه ده هباب
جدو هباب
اللى قلبها خراب فى خراب
و اللى وحلها كمان بزيادة
ابنه الشاب
انحس دمّ و ارخم شاب
وشايف ان الأب ..و شاب
والمستقبل جايّ ع الباب
المستقبل ..فاتح حضنه
والحظ مقابل بالترحاب
بس زماننا زمن ..قلّاب
قنبلة و انفجرت
شالت كل الشلّة الفاسدة
الواد و ابوه و الست الوالدة
وخدّامينهم ..وهجّامينهم
واللى لحم فساده منهم
كله هجّ
لمّا زلزال فجأة رج ّ
دولة الظلم المكين
لمّا صوت الرفض ضجّ
فوق دماغ المجرمين
نجح الكمين !
اللحية كت راسماها صح
والكاب موافق ع المناورة
و فوق ترابيزة المشاورة
قالوا ثورة
باي يا جدو.. اركن يا عورة
مافيش شروط و مافيش محاورة
تعظيم سلام
خلص الكلام
آدي كسب غير مشروع
وآدي غاز ماهوش ممنوع
على كلاب الصهاينة
وآدي رشوة بالفدادين
وآدي سرقة بالملايين
آه يا ذمم خاينة
و آدي الف زرعة مسرطنة
و آدي الف صفقة معطّنة
من غير فحص و معاينة
والخير طوفان للركب
غرّق جميع الرتب
حلوة الحياة و زاينة
افتح لهم قفص اتهام
وافتح قضية قرن
و جحيم من الإعلام
و اتنصبت المكلمة
والف ميت محكمة
خلاص كده...اعدام ؟!
لأ لسه يا كرام !!
اللحية ويّا الكاب
لعبوا سوا ألعاب
سنتين فى قط و فار
كل واحد ليه عرايسه
يتحرّكوا بريموت
وناس ماهيش فى العزبة
تدفع تمن و تموت
الف روح عاشقة و طاهرة
اتدّبحت وسط المظاهرة
الورد اللى فتّح جناين مصر
انعصر فى السكّة عصر
واللحية ويّا الكاب
مالهمش غير ( القصر)
واللحية ويّا الكاب
رصصوا الكنبة فى طابور
سيبكم من الدستور
والطريق على فين
مافيش خلاص فترات
مدة واحدة.. مدّتين
انسوا خلاص الميدان
والفلول داين تدان
بكره هاتبقى الحياة
متزوقة ألوان
وكل شىء موجود
بارخص الاتمان
جانا الرئيس الأبلج
والحُكم اصبح ابهج
رجليّ بتخر دم
ولا باتعب ولا بنهج
اهلى وعشيرتي و ناسي
يا شعب عاش بيقاسي
وكان بالدعاء يلهج
يا رب نخلص م الفساد
اللى عشش فى البلاد
و اصبح خلاص..منهج
آدي الحكم الجديد
بيضرب من حديد
اركن يا طنطا و يا سامي
اركن يا كل حرامي
والنائم العام
يرحل على الفاتيكان
والنهضة طايرة فى السما
ولسه فى الامكان
والبرلمان و اللجنة
هاعمل لهم اعلان
وكل اللى جاى يتحصّن
من كل فِل جبان
و الكاب على الابواب
واقف بيتفرّج
مستاء و متضايق
مين ده اللى بيهرّج ؟!
الابلج دخل فى الحارة
زعّق فى كل الناس !!
فى المذيع وفى الامين وفى القضاة
وفى النيابة و فى الديابة و فى الطغاة
فى الصحافة و السخافة و فى جبهة الجمباز
وفى الفلول و الجنرالات و احزاب الازاز
وفى وزارة الكهربه و فى ملوك النخربة
والبلطجية المزقوقين و فى تروس العقربة
الدنيا صبحت ...كركبة !
طوابير على البنزين طوابير على البوتاجاز
والكهربا و المية و النيل اللى طلعله سد !
وبورسعيد وحماده و دومة والف حد و حد !
وتعالي ونا اقولِك و الجِندي و جيكا
وكملت بالشيعة ..و احمدى نجاز !!
ولعت...بأوسخ جاز !!
والحق لو يتقال
فاشل و زادوه فشل
ومالهش ولا انجاز
ولا هوّ ساعد نفسه
ولا الجماعة ولا السلايفة
ولا اىّ حد فى اىّ طايفة
الوسط و الوطن و حازمون
واللى عصروا عليه لمون
الرجال و العيال و السيدات والهارمون
هوبا يوم : ثلاثون
وقت الرحيل اتعلن
وكل شيء فى السر
اصبح خلاص فى العلن
ازهر ..كنيسة..وبوب
وحزب زور هيلاهوب
شكرا...و إلى اللقاء !!
اللحية خفيت و راحت
وقالوا فجر بشايره لاحت
وكفاية للناس اللى فاحت
وباعتنا لموزة و العثمانلى
وللحاخام و الامريكانلي
والكاب بدأ المسيرة
خارطة طريق من تاني
المرحلة صعب..وعسيرة
نور عنينا يا شعب محروم م الحنان
آن الآوان يا شعب
تعيش فى واحة من الأمان
كل اللى برّق ليك عنيه
و اللى مدّ فى يوم ايديه
اللى هدد بالسلاح
و انه راح يملا الميادين
اختفى فى قعر الزنازين
انتهى و راح و انعدم
مين اللى يقدر بس مين
لا عاش ولا كان
انتو اللى جبتوهم زمان
و عرفتوا ايه معنى الندم !
صفحة وخلاص انطوت
غلطة موش ممكن ..كبيرة
بس عدّت ..و انطوت
لا طمعت يوم للسلطنة
لا نويت و لا دماغي انتوت
روحي فداكم و فدا بلدي
اللى من خيرها اتروت
احنا قوة راشدة
شافت عبط.. قامت انزوت
بس لما نديتوا ..جينا
بالقوة كلمتنا احتوت
وكسرنا خصم عنيد و غاشم
لما رجليه اتلوت
فى الطين ..وبان
لكل اهبل أو فطين
لحظة الحلم استوت !!
جانا الرئيس المُرْتَجل
أجل
اللى بيحب العجل
المستقيم ..اللى ما يعرف حجل
اللى ما بيخافش ابدا
واللى ما بيهابش
من اهل الغش و اهل الهبش
واللى اهل الشر منه
عايشين جحيم رعب و وجل
اللى عنده تلات فلاتر
صدق...و امانة..و كمان خجل
و حلول لكل المشاكل
طويلة و قصيرة الأجل
الرغيف اربع تربع
وناخدها مشي و ايه يمنع
و اللنض هاتبقى ليد
والدعم هانشيله فى مراحل
والضريبة على الجايّ و ع اللى راحل
موش هانجري ولا نمدّ
احنا حانئفز الف قفزة
بكره هانفتح الف نافذة
وفى الفساد دغدغ و هِد ّ
السوس اللى ف ارض الفيروز
والسوس اللى سنين مغروز
موش ويانا ..هاتبقى الضد
ومصيرك النفى الكامل
هي كده طبّل يا تجامل
عزبتنا ..و من جد الجد ّ !!
و التاجر اللى هايحتكر
مجنون و سيبه يفتكر
مافيش فى الدنيا غيره حد
وبمعرفتنا هايتلسوع
السوق هاناخده و هانوزّع
و الكل يشبع فرد فرد
المصانع و المزارع و الشواطىء و المناطق
المباني و الكباري و الخنادق و الفنادق
اى شىء وكل شىء هايبقى لينا
وضع يد !!
(ايوه باتكلم بجد)
م الابرة للصاروخ
السكر و البطروخ
الحلو ولا الحادق
احنا اصحاب كل شىء
الشاشات و الاجهزة
احنا بحر الأستذة
واحنا اصحاب البنادق
واحنا اصحاب المبادىء
اشمعنى يعني اللحية ..
كسبت من كل ناحية ؟!
ميت مدرسة دولية
والف ميت مستوصف
والف مليون صرافة
عملوا ميت جمعية
والف ميت مشروع
و ناس تصدّق الخرافة
فلوس بتبرع ذاتي
تعمل كيان معجزاتى
امواله فوق الوصافة ؟!
كانت حلال للشاطر ..
وحرام على اللى خاطر
بروحه..فين الثقافة ؟؟!!
اللحية زي الكاب
و الكاب كما اللحية
مالهمش ذمة فلوس
وكل شىء مدروس
زيبق و مالهش مسكة
ولا شرح و لا اسباب !!
والرئيس المرتجل
هرانا ميت انجاز !!
قضى على الارهاب
و البحر طلّع غاز
والمؤتمر الاستعراضي
وحق تمليك الاراضي
والسياحة و النمو
معدّلات...اعجاز !!
و المحطة النووية
والخدمة حلوة و مدنية
والتفريعة المية مية
وعاصمة تانية ادارية
والسدّ الطايش بغباوته
خلّصناه باتفاقية
والمليون فدان ..و نص
والمزارع السمكية
واى فاى بالمجان
فى اتوبيساتنا العالمية
والتاكسي الطاير بسلامته
شوفوا يا حقوق الانسان
وبرج زايح و كريستالته
و القطر الكهربائى
والدوا عارفين اصل حكايته
بيعالج اى وبائي
ولو معرفتش اني اصدّق
يبقى من جهلي وغبائي
وتجديد الخطاب
والسلام الدافي
شايلك يا بلدنا
فوق راسي و كتافي
والعرّاف قالهالي
هاتشرّد ناس فى منافي
التاج مكتوب على اسمي
مترتّب على اوصافي
انا حلّال العقد
وانا نبع الحكمة الصافي
اللى بيعارض ..( تيران )
والجنان موش وصف كافي
مين بينكر شمس ساطعة
غير قلوب سودة ونطعة
بكره جاي بدون مقاطعة
بفرح انجازنا الخرافي !!!
أجل
كل شىء بكره يزهزه
لمّا هايحين الأجل
واللى يستحمل.. ينول
ايه يعني لو هايطول
أمد المسيرة المحتمل
ايه يعني جيل ولا جيلين
بس ما نمدّش ايدين
ولا انتو راح تاكلوها يعني ؟!
اصل لو ينفع يكون
فيه بيع بشر ..كان حدّ باعني !!
شربت مية عشر سنين
والجوع ما أثّرش و وجعني
فى كل شىء لازم انضباط
وشوفوا ايه اللى نفعني
اخلاص ..تجرّد..ارتباط
بتراب بلادنا اللى منعني
اظلم فى يوم ..او اهد حد
لو مين اذاني و مين خدعنى
اجل
انا رجل الافعال و انا رجل الاهوال
ونا حامى الحمى و انا رجل الاموال
انا رجل الحقيقة
وما بابيعش الدجل !!
واللحية يا سامعين
يا المنفى ..يا الزنازين
لكن اكيد ..طالعين
اصل الحكاية يا كرام
حبة خصام
اللحية ويا الكاب
وش و قفا قلاب
وكراسي متقسمة
ولكل واحد ناب
مهما تبان المسألة
مهزوم قصاد غلاب
حدوتة شفنا زيها
ييجي تلميت مرة
العزبة للاتنين
واصحابها فين ..؟؟!!
برّه !!
حدوتة شفنا زيها
ييجي تلميت مرة
العزبة للاتنين
واصحابها فين ..؟؟!!
برّه !!
.............
مصر اللى حالها حال
تعبت من الترحال
من حال لحال لحال
مكتوب عليكي الندل
والعرة و الدجال
ما يقومش يوم زلزال؟!
يا شايلة حمل جبال
او يرزقك ربنا
بحبة رجال ابطال
بس انتى قولى يا رب
لازم يروق الحال
بس انتى قولى يا رب
لازم يروق الحال
..........
عادل حجازي
8-12-2016
تعليقات
إرسال تعليق