الكروديات جمع كروديا ..والكروديا يعنى المغفّل ..الساذج ..العبيط ..الى آخر قايمة الكلمات التى تدل على غياب صفة العقل عن صاحبها !
والكروديا ليس بمعنى الجنون ..لكن بمعنى السفه وانعدام التمييز !
والكروديات ..جمع مؤنث سالم ..عشان تعرفوا انى جامد فى النحو وقواعد اللغة العربية !
وقد يكون احد معانى الكروديات ..هم هؤلاء الاشخاص الذين يظنون انفسهم اذكى الاذكياء ..وهم فى حقيقة الامر اغبى الاغبياء !!
خش فى الموضوع !
حاضر !!
البنات الحلوات اللذيذات المحترمات اللى ماشيين مع ولاد من ورا اهاليهم تحت مسمى الحب والغرام
حاجة من الاتنين
يا هّم عارفين كل حاجة وفاهمين كل حاجة ..يعنى عارفين انهم بيستهبلوا على نفسهم وعارفين ان الحكاية مجرد تمثيل فى تمثيل ..واتنين واكلين ودن بعض طول الوقت بكلام من محفوظات الاغانى والافلام العربى القديمة
..هّو يقولها كلام حلو ويعيِّشها فى الدور
..دور البنت المعجزة اللى غربلت حياته وسهّرته الليالى بدل الناموس أو الاكلان اللى فى بيتهم ..وان هىّ رقيقة وطيبة وحنّينة واجمل واحدة فى الدنيا ..وانّه حيرمى نفسه تحت قطر لو راحت اتجوزت غيره !!..الى اخر الشويّتين ايّاهم !
وهى تقولّه كلام حلو وتعيّشه برضو فىالدور
ان انت اوسم من رشدى اباظة واذكى من اينشتاين و اجدع راجل شافته فى حياتها – على اساس انها اتعاملت مع رجّاله الكون كلّه !- وان انت قد كدة طيب وقد كدة نادر فى الوجود..وان اللى زيّك انقرض من زمان- زى حيوان المأموث كدة !!- وانّك هدية من السما ..وان انت اللى عّرفتها طعم الفرحة بعد الاحزان والاهوال اللى عاشتها فى حياتها …الى اخر الاسطوانات الهبلة المشروخة !!
يا امّا من النوع التانى …كروديات !!
مغّفلات وبيضّحك عليهم وهمّ مصدّقين شويه الفشلة – جمع فاشل – اللى همّ ماشيين معاهم ..ومصدّقين ان حيبقى فيه دبل ومأذون وزفة ومعازيم وبنين وبنات !!
النوع الاولانى
..ممكن نطلق عليه – اللى عاملين نفسهم كروديات – يعنى عاملين نفسهم مصدّقين ..وبيكملوا الحكاية بمزاجهم !! طب هدفهم ايه ؟؟؟
هدفها انها تبقى زى البنات اللى حواليها ليها حبيب ..ليها عاشق ..مغرم !
بيطمّن عليها كل يوم بالموبايل – يخرب بيت الموبايل واللى اخترعه - و لازم يقولّها تصبحى على خير يا كوكو قبل ماتنام !! وبيعمّلها شرايط كوكتيل بأجمل الاغانى العربية كل فترة ..وبيجيبلها هدية فى عيد ميلادها …ودبدوب كبيييييييير من الموسكى – ومفهّمها انه من اركيديا مول - فى يوم الفالانطين !! اربعتاشر فبراير – دة عيد الحب بتاع الخواجات …بتاعنا احنا بقى اربعة نوفمبر ..قبل عيد الطفولة بتاع ماما صفاء ابو السعود اللى نسيوه عشرين نوفمبر….قبل عيد الجد – اشمعنى الام يعنى - اللى لسّه حيخترعوه !
وما دام بقى ليها حبيب …تمشى وسط الشلّة رافعة راسها …اهوه …انا ليّا معجبين وكروديات بيحّبونى …وميّتين فى دباديبى …عشان تعرفوا ان انا بنت جنّية فتّاكة !!
و يا سلام بقى لو كانوا ولدين تلاته هم اللى مصّيتنها – من الصيت – فى المدرسة - آه فى المدرسة ما تستغربش قوى كدة - أو فى الجامعة !
وساعات بتبقى بنت لهلوبة قوى…. من وهى ّ فى اعدادية مأنججة بئف صغيّر على الكورنيش - والله شفتها بعنيّا !!
يا عمّنا دة جيل تكنولوجى جيل الانترنت !!
احنا فى عصر السرعة يابا !!
وساعات فى ابتدائية كمان من غير ما أحلف !!!
وطبعا النوع الاولانى دة …اللى مستكرد نفسه بنفسه …وعنده رضا وسلام استكرادى مع نفسه ..ومتأقلم مع ذاته - كلام كبير قوى ! - ومتصالح مع مثالبه ونقائصه الشخصية - كلام كبيرجدا !! – الحيادى مع الجميع ..الابلج الافوج الاثوج …النوع الاسود دة …بيبقى مأفلم على طوب الارض لحد ما تيجى جوازة دفيانة يقوم يدّى استمارة ستة على طول للحبيب المرحلى القديم البائد البايت ..نظرا لمرحلة انتقالية جديدة ..هى خطيبى ومقدرشى اخونه …أو جوزى وخليّنا اخوات احسن !!!
النوع التانى بقى
اللى همّ الكروديات الكروديات !!
اللى بجد يعنى !!!
بنت عمّاله تشوف افلام رومانسية و بتسمع ليل نهار اغانى و كل اللى حواليها يا متجوزة يا مخطوبة ..تلاقيها اصبحت فجأة …حتموت وتعيش الحالة !! بأى شكل !! لحد ما تقع فى ايد دنجوان محترف يدّيها كل الوهم اللى هى كانت بتحلم بيه …لحد ما تقلب المسألة جد ….وابن خالتى حيتقدّملى ..وبابا وماما موافقين ….ونا مش عرافة اعمل ايه ؟؟؟؟؟؟!!!!!!
يقوم الزبون يدّى خلعون فورا !!
ونظام ..اصل انا لسّه تافه وباخد مصروف من ماما …وقدّامى جيش …ولقمة عيش …وبطالة ..وسفر على مركب لليونان ..وغرق فى البحر ..وطوق بيتحدف …ومنى الشاذلى بتاعت دريم الفضائية بتستضيفنى .و…و…و…و..و حواديت سودة كتيرة ….ونا مش عايز اظلمك ..شوفى مستقبلك انتى …وفتّك بالعافية !!!!
بنات ارياف ..على بنات مدن …كلهم بنات حيموتوا ويعيشوا الحالة وخلاص !
والنهاية
قلب مكسور- دة لو كان فيه مشاعر حقيقية زى النوع التانى المسكين بجد
ومشاعر مهدرة ..وسمعة اهدرت فى بعض الحالات الكارثية …وروح معذبة من احساسها بالخيانة
خيانة الاهل …اللى بيربوا وبيطفحوا الدم عشان عيالهم يلبسوا وياكلوا ويتعلموا ويبقوا محترمين ومستورين فى غابة الدنيا !
وخيانة الزوج القادم – لأنّه مش نمرة واحد فى حياتها !!
وخيانة – وهو الاهم والاخطر - خيانة الامانة التى حمّلها الله – سبحانه وتعالى- للانسانة المسلمة !
بسم الله الرحمن الرحيم
إِنَّ الْمُسْلِمِينَ وَالْمُسْلِمَاتِ وَالْمُؤْمِنِينَ وَالْمُؤْمِنَاتِ وَالْقَانِتِينَ وَالْقَانِتَاتِ وَالصَّادِقِينَ وَالصَّادِقَاتِ وَالصَّابِرِينَ وَالصَّابِرَاتِ وَالْخَاشِعِينَ وَالْخَاشِعَاتِ وَالْمُتَصَدِّقِينَ وَالْمُتَصَدِّقَاتِ وَالصَّائِمِينَ وَالصَّائِمَاتِ وَالْحَافِظِينَ فُرُوجَهُمْ وَالْحَافِظَاتِ وَالذَّاكِرِينَ اللَّهَ كَثِيرًا وَالذَّاكِرَاتِ أَعَدَّ اللَّهُ لَهُمْ مَغْفِرَةً وَأَجْرًا عَظِيمًا (35) سورة الاحزاب
بسم الله الرحمن الرحيم
قَدْ أَفْلَحَ الْمُؤْمِنُونَ (1) الَّذِينَ هُمْ فِي صَلَاتِهِمْ خَاشِعُونَ (2) وَالَّذِينَ هُمْ عَنِ اللَّغْوِ مُعْرِضُونَ (3) وَالَّذِينَ هُمْ لِلزَّكَاةِ فَاعِلُونَ (4) وَالَّذِينَ هُمْ لِفُرُوجِهِمْ حَافِظُونَ (5) إِلَّا عَلَى أَزْوَاجِهِمْ أَوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ (6) فَمَنِ ابْتَغَى وَرَاءَ ذَلِكَ فَأُولَئِكَ هُمُ الْعَادُونَ (7) وَالَّذِينَ هُمْ لِأَمَانَاتِهِمْ وَعَهْدِهِمْ رَاعُونَ (8) سورة المؤمنون
فهل آن لبناتنا ان يعرفن حق الاهل والمجتمع …وقبل ذلك حق الله – عزّوجلّ
وهل آن للاباء – والآباء قبل الامهات ان يراقبوا ويوّجهوا بناتهن ولا يكتفوا بدور المموّل المادى فقط !
ولا يتركوا بناتهم للقنوات الفضائية و لشلّة الاصحاب دون اى نوع من الرقابة !!
فالابوّة لا تعنى ابدا القدرة على الانجاب بالمعنى البيولوجى …بل الابوة – وانا اركّز عليها الف مرة قبل الامومة – ان تكون مسئولا عن ” تربية ” البنت كأم مستقبلية و كزوجة مستقبلية وان تزرع القيم والاخلاق الفاضلة …لتحصد فيما بعد
وان نضع امام كل بنت من بناتنا هذا الفهم
اننا لسنا معك فى الاربعة والعشرين ساعة ..لكى نرى ( كل ) تصرفاتك وافعالك ..ولكى نسمع ( كل ) كلامك على الموبايل او مع اصدقائك
لكن الله - عزّ وجلّ - يسمع ويرى .
والى لقاء
لو كان فى العمر بقية
دمتم بخير
عادل حجازى
17-4-2008
ليست هناك تعليقات:
إرسال تعليق