الخميس، 13 أكتوبر 2016
الأحد، 9 أكتوبر 2016
أرجوك افهم مشاعري ( شعر غنائي )
أرجوك افهم مشاعري
وبلاش كُتْر الآلام
ارجوك اعمل لخاطري
واسمع من غير ملام
انت....موش حب عمري
وقلبي..ماهوّاش بأمري
عاشقة..لغيرك و عذري
إني صارحتك قوام !!
أرجوك افهم مشاعري
...........
..........
انت بالنسبه ليا
موش أكتر من صديق
وعشان غالي عليا
مقبلش تكون غريق
ف غرام...مالهوش صدى
واحلام..طايرة ف فضا
مكتوب لينا و قضا
نبقى مجرّد صحاب !!
انت....موش حب عمري
وقلبي..ماهوّاش بأمري
عاشقة..لغيرك و عذري
إني صارحتك قوام !!
أرجوك افهم مشاعري
................
..............
قلبي و روحي و عنيا
دابوا و عشقوا حبيب
غيرك و بصفو نيّة
جرحوا القلب القريب
آسفة ..انى اعمل كده
و اجرح...قلبك كده
عارفة و متأكدة
بس انا برضه فى عذاب !!
أرجوك افهم مشاعري
..........
عادل حجازى
18-5-1996
كلام فى كلام ! ( شعر غنائي )
وآهو بس كلام..وكلام ف كلام
حبّك يا حبيبى..كله كلام
بتقول و تقول..شىء موش معقول
واحترت معاك ..و غُلبت ملام
ويا إمّا تكون ..صادق ف هوايا
آه يا إمّا تشوف..للحب نهاية
أنا موش حِمْل عذاب و آلام !
..........
..........
فيها ايه لو قلبك..يبقى صريح
ولا الحيرة دي..طبع مريح
خلّي هوانا كلّه وضوح
وبلاش تعاند..قلب جريح
ويا إمّا تكون ..صادق ف هوايا
آه يا إمّا تشوف..للحب نهاية
أنا موش حِمْل عذاب و آلام !
............
............
فيها ايه لو قلبك ..يبقى قريب
من غير حيرة ..و بُعْد غريب
قول لمشاعرك مرة تدوب
وتبقى معايا..أرق حبيب
ويا إمّا تكون ..صادق ف هوايا
آه يا إمّا تشوف..للحب نهاية
أنا موش حِمْل عذاب و آلام !
وآهو بس كلام..وكلام ف كلام
حبّك يا حبيبى..كله كلام
بتقول و تقول..شىء موش معقول
واحترت معاك ..و غُلبت ملام !
................
عادل حجازي
25-5-1995
الأحد، 2 أكتوبر 2016
اكدّب عنيّا ؟َ! ( شعر غنائي )
اكدّب عنيا و أقول
كانت واحدة تانية
لأ طبعا موش معقول
موش هاخدع عنيّا
انتي اللى كنتى معاه
ماشية هنا ويّاه
وف عينك هواه
باين ف نظراتك.
طب ليه كان الخداع
ونا اللى قلبي ما باع
لحبّك...الوداع
ولكل ذكرياتك .
.........
.........
الحلم اللى عشقته
و هويته السنين
كان وهمي اللى انا شفته
بدمع العنين
حتيجيني و تترجاني
نرجع للشوق من تاني
لكن آسف موش هاقدر
ارفض ارجعلك تاني
........
........
القلب اللى هجرني
و جرحني و ظلم
بكره حيفتكرني
بدموع الندم
و تجيني و تترجاني
نرجع للشوق من تاني
لكن آسف موش هاقدر
ارفض ارجعلك تاني .
.............
عادل حجازي
23-12-1996
السبت، 10 سبتمبر 2016
غلطانة ( شعر غنائي )
غلطانة ..لو كنتى فاكرة
هاتسامح ف كرامتي
و ارجعلك بدموعي بكره
وانسالك إهانتي
دنتي خلاص بعد اللى كان
من خداعك و الهوان
اتنسيتي وبقيتي ذكرى .
..........
..........
كنت بحلم ألقى قلبك
زي قلبي كله حب
كنت واهم ياللى قلبك
كل نبضة منه كدب
وجايّة تاني من جديد
تندهي الماضي البعيد
متأسف جدا..نسيتك .
غلطانة ..لو كنتى فاكرة
هاتسامح ف كرامتي
و ارجعلك بدموعي بكره
وانسالك إهانتي
........
........
كنت برسم حلم عمرى
قصر عالي كله ورد
بس قلبك هان له امري
والطريق كان آخره سد
وجايّة تاني من جديد
تندهي الماضي البعيد
متأسف جدا..نسيتك .
غلطانة ..لو كنتى فاكرة
هاتسامح ف كرامتي
و ارجعلك بدموعي بكره
وانسالك إهانتي
دنتي خلاص بعد اللى كان
من خداعك و الهوان
اتنسيتي وبقيتي ذكرى .
..........
عادل حجازي
30-7-2016
الخميس، 8 سبتمبر 2016
هنساكي ( شعر غنائي )
كل اللى أنا طالبه منّك
تنسيني باختصار
وكفاية شفت منّك
أيام جرح و مرار
..........
أنا موش هاسمع كلامك
و ارجعلك من جديد
دنا لسّه نار آلامك
بتقولّى ابعد بعيد
هنساكي خلاص كفاية
انا موش كتلة جليد !
كل اللى أنا طالبه منّك
تنسيني باختصار
وكفاية شفت منّك
أيام جرح و مرار
.........
قلبي كان كلّه ليكي
كان لك أوفي حبيب
محسّتهوش عنيكي
وكان م الاوّل غريب
هانساكي خلاص كفاية
دي القسمة و ده النصيب
كل اللى أنا طالبه منّك
تنسيني باختصار
وكفاية شفت منّك
أيام جرح و مرار
.....
عادل حجازي
1-9-1996
الأربعاء، 7 سبتمبر 2016
فى يوم (شعر غنائي )
في يوم ولا كان ف بالي
و ف ليلة م الليالي
صوتها الفرحان ندالي
وقالتلي انا معزوم
بكره فى حفلة زفافها
ع الفارس اللى شافها
و ف ثانية جه و خطفها
وبقيت أنا المهزوم
انساها خلاص يا قلبي
وبلاش حزن و آهات
بكره الأيام يا قلبي
هاتعوّضنا اللى فات
سلّم و ارضى بنصيبك
وبلاش تبقي خيالي
في يوم ولا كان ف بالي
و ف ليلة م الليالي
..........
مخنوق ..فيّا الكلام
مخنوق ..فيّا السُكات
مجروح جوّايا نار
وكلامي زيّ الآهات
هنّيتها و ناري فيّا
على فرحتها اللى جايّه
و دموعي مدّارية
بعذاب آخر لُقى
في يوم ولا كان ف بالي
و ف ليلة م الليالي
.............
مكتوب..لينا الفراق
مكتوب..لينا البعاد
مكتوب نفضل يا قلبي
عن أحبابنا بُعاد
ناسيانا و موش ف بالها
ولا يوم كنا فى خيالها
خلّيها بعيد فى حالها
وكفاية عذاب بقى
في يوم ولا كان ف بالي
و ف ليلة م الليالي
صوتها الفرحان ندالي
وقالتلي انا معزوم
بكره فى حفلة زفافها
ع الفارس اللى شافها
و ف ثانية جه و خطفها
وبقيت أنا المهزوم
...............
عادل حجازى
25-11-1996
الثلاثاء، 6 سبتمبر 2016
ما تبطّليش كلام ( شعر غنائي )
كلّميني عنّك...قرّبيني منّك
يا أميرة عمري..نسّميني فنّك
عرّفيني اهتماماتك
اللى شاغل أوقاتك
باختصار...كل حياتك
كل حاجة......عنّك !
.........
.........
الكلام بينّا غُنا
والغرام مكتوب لنا
مهما قلتي ..ولا عدتي
لسّه شوقي يا أميرتي
وعشان كده..ولكل دا
ما تبطّليش أبدا كلام !!
كلّميني عنّك...قرّبيني منّك
يا أميرة عمري..نسّميني فنّك
.......
.......
الحياة ضحكت لنا
لمّا دُبنا ف حبنا
مهما قلتي ..ولا عدتي
لسّه شوقي يا أميرتي
وعشان كده..ولكل دا
ما تبطّليش أبدا كلام !!
كلّميني عنّك...قرّبيني منّك
يا أميرة عمري..نسّميني فنّك
عرّفيني اهتماماتك
اللى شاغل أوقاتك
باختصار...كل حياتك
كل حاجة......عنّك !
.........
عادل حجازي
7-1996
السبت، 3 سبتمبر 2016
انا ولا هوّ ؟ ( شعر غنائي )
فكّري..أنا ولّا هوّ
مين ياقلبي هاتختاري
قرري..أنا ولّا هوّ
ياللى شوقك مدّاري
بس قبل الاختيار
فكّري فى كل اللى دار
من هوايا و من هواه
واعلني ..آخر قرار
فكّري..أنا ولّا هوّ
.......
.......
انتى ف عيوني الدنيادي
وفرح عمري امّا ينادي
امّا ف عيونه..شىء عادي
ولا عمره كان قد ودادي
وان بقيتي يوم ف ايديه
هاتبقي حاجة بيملكها
وامّا تقدم يوم ف عنيه
بسهولة جدا يتركها
مين ياقلبي مين ياعمري
مين يا قلبي هاتختاري ؟
.........
.........
موش قصدي ابدا تحتاري
انا بس عايزك تختاري
ما بين طريقه و مشواري
وكفاية حيرتي و طول ناري
و تشوفي مين باقي عليكي
وعاش عيونك يعشقها
مين مشاعره بتتكّلم
وقلبك انتى مصدّقها
مين ياقلبي مين ياعمري
مين يا قلبي هاتختاري ؟
فكّري..أنا ولّا هوّ
مين ياقلبي هاتختاري
قرري..أنا ولّا هوّ
.........
عادل حجازي
يوليو-1996
الاشتراك في:
الرسائل (Atom)
معرفش الكراهيّة ( شعر غنائي )
معرفش الكراهيّة وان عرفتها هيّا و دا موش ضعف منّي لكن طبع فيّا كراهيتي ..نسيان كل ما عدا و كان وافضل انا انسان مايعرفش ال...
-
الهشكات جمع هشكة ! والهشكة هى البنت ال……!! نقول عليها ايه عشان الرقابة ؟؟!! اللى مش مظبوطة ..ولّا….الصايعة …وبالمناسبة كلمة صاع – انحرف يعنى...
-
الفاتحة لمحمد على ..!! ( قراءات ) كتبهاعادل حجازى ، في 27 يوليو 2010 ...
