غلطانة ( شعر غنائي )

غلطانة ..لو كنتى فاكرة

هاتسامح ف كرامتي

و ارجعلك بدموعي بكره

وانسالك إهانتي

دنتي خلاص بعد اللى كان

من خداعك و الهوان

اتنسيتي وبقيتي ذكرى .

..........

..........

كنت بحلم ألقى قلبك

زي قلبي كله حب

كنت واهم ياللى قلبك

كل نبضة منه كدب

وجايّة تاني من جديد

تندهي الماضي البعيد

متأسف جدا..نسيتك .

غلطانة ..لو كنتى فاكرة

هاتسامح ف كرامتي

و ارجعلك بدموعي بكره

وانسالك إهانتي

........

........

كنت برسم حلم عمرى

قصر عالي كله ورد

بس قلبك هان له امري

والطريق كان آخره سد

وجايّة تاني من جديد

تندهي الماضي البعيد

متأسف جدا..نسيتك .

غلطانة ..لو كنتى فاكرة

هاتسامح ف كرامتي

و ارجعلك بدموعي بكره

وانسالك إهانتي

دنتي خلاص بعد اللى كان

من خداعك و الهوان

اتنسيتي وبقيتي ذكرى .

..........

عادل حجازي

30-7-2016

انا يونس فى بطن الحوت " قصيدة عامية "

PublicFriendsFriends except AcquaintancesOnly MeCustomClose FriendsFamilySee all lists...Cairo UniversityJudgeCairo, Egypt AreaAcquaintancesGo Back

مانيش زعلان ...ولا مبسوط

ولا مرتاح ...ولا مَضغوط

ولا براحتي ...ولا مَكْبوت 

ولا ف حيرة ..ولا مَظْبوط 

أنا عايش كأنّي باموت 

أنا عايش كأنّي باموت 

مانيش واحد ...ولا مَجْموع 

ولا سامع ...ولا مَسْموع 

ولا مسموح ...ولا ممنوع 

أنا الضحكة اللى فيها دموع 

أنا الخطوة اللى مالها رجوع

أنا الخطوة اللى مالها رجوع

أنا الطيّب ...ونا الشرّير

عجوز جدا ...وطفل صَغير 

جبان لكن ...من المَغاوير 

ونا السكّة ...ونا المشاوير 

أنا الواقع ...ونا الأساطير 

و  متكتّف ...لكنّى باطير 

أنا البحّار ...وما لي شطوط 

ونا الكاتب ....بألمُه خطوط 

أنا الصدمة ...ونا المَخبوط 

أنا صخر الجبل مَنحوت 

انا يونس فى بطن الحوت

انا يونس فى بطن الحوت

ع

عادل حجازي

 16-4-2013

هنساكي ( شعر غنائي )

كل اللى أنا طالبه منّك

تنسيني باختصار

وكفاية شفت منّك

أيام جرح و مرار

..........

أنا موش هاسمع كلامك

و ارجعلك من جديد

دنا لسّه نار آلامك

بتقولّى ابعد بعيد

هنساكي خلاص كفاية 

انا موش كتلة جليد !

كل اللى أنا طالبه منّك

تنسيني باختصار

وكفاية شفت منّك

أيام جرح و مرار

.........

قلبي كان كلّه ليكي

كان لك أوفي حبيب

محسّتهوش عنيكي

وكان م الاوّل غريب

هانساكي خلاص كفاية

دي القسمة و ده النصيب 

كل اللى أنا طالبه منّك

تنسيني باختصار

وكفاية شفت منّك

أيام جرح و مرار

.....

عادل حجازي

1-9-1996

فى يوم (شعر غنائي )

في يوم ولا كان ف بالي

و ف ليلة م الليالي

صوتها الفرحان ندالي

وقالتلي انا معزوم 

بكره فى حفلة زفافها 

ع الفارس اللى شافها 

و ف ثانية جه و خطفها

وبقيت أنا المهزوم

انساها خلاص يا قلبي

وبلاش حزن و آهات

بكره الأيام يا قلبي

هاتعوّضنا اللى فات

سلّم و ارضى بنصيبك 

وبلاش تبقي خيالي

في يوم ولا كان ف بالي

و ف ليلة م الليالي

..........

مخنوق ..فيّا الكلام

مخنوق ..فيّا السُكات

مجروح جوّايا نار

وكلامي زيّ الآهات

هنّيتها و ناري فيّا

على فرحتها اللى جايّه

و دموعي مدّارية

بعذاب آخر لُقى

في يوم ولا كان ف بالي

و ف ليلة م الليالي

.............

مكتوب..لينا الفراق

مكتوب..لينا البعاد

مكتوب نفضل يا قلبي

عن أحبابنا بُعاد

ناسيانا و موش ف بالها

ولا يوم كنا فى خيالها

خلّيها بعيد فى حالها

وكفاية عذاب بقى 

في يوم ولا كان ف بالي

و ف ليلة م الليالي

صوتها الفرحان ندالي

وقالتلي انا معزوم 

بكره فى حفلة زفافها 

ع الفارس اللى شافها 

و ف ثانية جه و خطفها

وبقيت أنا المهزوم

...............

عادل حجازى

25-11-1996

ما تبطّليش كلام ( شعر غنائي )

كلّميني عنّك...قرّبيني منّك

يا أميرة عمري..نسّميني فنّك

عرّفيني اهتماماتك

اللى شاغل أوقاتك

باختصار...كل حياتك

كل حاجة......عنّك !

.........

.........

الكلام بينّا غُنا

والغرام مكتوب لنا

مهما قلتي ..ولا عدتي

لسّه شوقي يا أميرتي

وعشان كده..ولكل دا

ما تبطّليش أبدا كلام !!

كلّميني عنّك...قرّبيني منّك

يا أميرة عمري..نسّميني فنّك

.......

.......

الحياة ضحكت لنا 

لمّا دُبنا ف حبنا

مهما قلتي ..ولا عدتي

لسّه شوقي يا أميرتي

وعشان كده..ولكل دا

ما تبطّليش أبدا كلام !!

كلّميني عنّك...قرّبيني منّك

يا أميرة عمري..نسّميني فنّك

عرّفيني اهتماماتك

اللى شاغل أوقاتك

باختصار...كل حياتك

كل حاجة......عنّك !

.........

عادل حجازي

7-1996

انا ولا هوّ ؟ ( شعر غنائي )

فكّري..أنا ولّا هوّ 

مين ياقلبي هاتختاري

قرري..أنا ولّا هوّ

ياللى شوقك مدّاري

بس قبل الاختيار

فكّري فى كل اللى دار

من هوايا و من هواه

واعلني ..آخر قرار 

فكّري..أنا ولّا هوّ 

.......

.......

انتى ف عيوني الدنيادي

وفرح عمري امّا ينادي

امّا ف عيونه..شىء عادي

ولا عمره كان قد ودادي

وان بقيتي يوم ف ايديه

هاتبقي حاجة بيملكها

وامّا تقدم يوم ف عنيه

بسهولة جدا يتركها

مين ياقلبي مين ياعمري

مين يا قلبي هاتختاري ؟

.........

.........

موش قصدي ابدا تحتاري

انا بس عايزك تختاري

ما بين طريقه و مشواري

وكفاية حيرتي و طول ناري

و تشوفي مين باقي عليكي

وعاش عيونك يعشقها

مين مشاعره بتتكّلم

وقلبك انتى مصدّقها 

مين ياقلبي مين ياعمري

مين يا قلبي هاتختاري ؟

فكّري..أنا ولّا هوّ 

مين ياقلبي هاتختاري

قرري..أنا ولّا هوّ

.........

عادل حجازي

يوليو-1996

كل يوم ( شعر غنائي )

كل يوم عن يوم بحبك

كل ساعة و كل ثانية

والعيون دابت ف حبّك

و ف غرامك دنيا تانية 

دنيا كلها م الأحلام

دنيا كلها م الأنغام

دنيا ما تعرف أوهام

كل يوم عن يوم بحبك .

..........

..........

ياللى القمر بيغير منّك

انتي اللى قلبي اختار قلبك

ومهما يوم يحصل منّك

انا برضو عاشقك و بحبك

دنتى الهوي ..اللى مافيش زيّه

ونتي القمر..فى جميل ضيّه

كل يوم عن يوم بحبك .

............

...........

أنا و السهر عاشقين سحرك

بندوب فى سيرتك و مشاعرك

القلب يسهر على صورتك

والليل ف عيني لون شعرك 

دنتى الهوي ..اللى مافيش زيّه

ونتي القمر..فى جميل ضيّه

كل يوم عن يوم بحبك .

.........

عادل حجازي

13-4-1996

الطيبة الغريبة ! ( شعر غنائي )

الطيبة الغريبة ..والعين الحبيبة..و الشوقة الرهيبة

بتحلم بقربك !

النظرة البريئة ...والهمسة الرقيقة..خلوني الحقيقة

اسلّم و احبك !

.......

........

عندي كلام كتير

فى الحب و الأشواق

بس الكلام أسير

للحرف و الأوراق

وعشان كده دا مُحال

ف كلام غنا ينقال

أو كلمة أو مرسال

أوصفلك ..كل حبى !

الطيبة الغريبة ..والعين الحبيبة..و الشوقة الرهيبة

بتحلم بقربك !

النظرة البريئة ...والهمسة الرقيقة..خلوني الحقيقة

اسلّم و احبك !

......

.......

الحب اللى ف قلبي 

بيفوق الخيال

و قلبك مع قلبي

دا الخير و الجمال

ايام ورا ايام

و غرامنا م الأحلام

ألقى فين الكلام

يوصفلك ..كل حبي !

الطيبة الغريبة ..والعين الحبيبة..و الشوقة الرهيبة
بتحلم بقربك !
النظرة البريئة ...والهمسة الرقيقة..خلوني الحقيقة
اسلّم و احبك !

.........

عادل حجازي

24-3-1996

و ما يمنعش ( قصيدة )

وما يمنعش ..
رغم القبر..و رغم النعش 
رغم صلاتى عليكى
فى وسط الناس
رغم الروح المتزلزلة احساس
لما قالولى ..اجمد...وخلاص
اصل الرايح.....ما بيرجعش

بس انا شايفك
لسه قصادي
رقمك على تليفونى ..وعادى
صوتك ما سمعتوش الصُبح
جايز مشغولة المرّة دي
بكره ...بعده ...زيّ الرمح
أنا صُلب ...حديد ...اصل انا عارفك
ما تحبّيش الحال المايع
والدلع البايخ ع الفاضى
طَب انا راضى
هافضل صابر...ما اتمَلْعَنش !

وما يمنعش ..
رغم القبر..و رغم النعش
ان الباب ...مستنى الخبطة
وان واحشنى
بجد ...الربطة
وحشاني اللمّة  السهرانة
بضحكة قلب..
مظبوطة ...ظبطة
ونا عارف كام يوم وهاتيجي
اصلك عمر ما شلتيلى
غلطة
ونا لو كنت بجد حبيبك
يبقى تسامحى
تبوسى ملامحى
تاخدينى ف حضنك
للصُبح
انا ميّت م الشوق ...والجرح
طعم السكر
اصبح ملح ...ومافيش فرْح
ونا عينى على صورتك ...ثابتة
ما بتدّمعش
رغم القبر.....و رغم النعش .
ونا عينى على صورتك ...ثابتة
ما بتدّمعش
رغم القبر.....و رغم النعش .

...........................

عادل حجازى
27-8-2014

افرض مُت ّ ؟! ( قصيدة )

افرض مُت ّ ؟! 

..........

افرض مُتّ 

وجالك خبرى

عادى نهاية عمرى 

وقدرى

يعني هاتبكي عليّا شويّة 

و تمشى جنازتى 

 هاتصلى وتدعيلي شوية 

وبعد ما تدفن ...كام كلمة على سلام

و... تُكُتّ !

يرحم ايامه ولياليه 

كان غالى و كان عالى فى قلبى 

بس ساعات كَتْ منّه تُشُط ّ 

كان طيّب ..يغفر له ذنوبه ..ومكانش

يحب الباراشوت !

ياخد حاجة ماهيّاش حقّه 

و عشان كده اتّاكل..

حقّه 

وياما حاولت بجد ....ازُقّه 

ياما كلّمته وياما وعّيته 

ولمّا زهق من رغيي ...سُكُتّ !

يا صاحبى اترحّم و ادعيلى 

يعني انا مُتّ..

ونت هاتعمل بطل الفيلم ؟!

خلص الفيلم 

لمّوا الحاجة وما تخلّوش ولا اى سبوتّ 

طفّى الدنيا 

و رُوح ...سلامات 

آخر لقطة زووم فى الكاميرا ...و

آخر....شوتّ !!

.....

عادل حجازى 

26-8-2014