زمان ونا فى المرحلة الجامعية ..فى النصف الثانى من تسعينات القرن العشرين ..كان يا ماكان ..واحد بزنس مان ابن جنيّة فى مصر..اكتشف اختراع هايل موجود فى اوروبا وامريكا من سنين واحنا نايمين فى الدرة..الموبايل !!
ايوة الموبايل !
هذا الجهاز التافه – تكنولوجيا – الموجود فى الغرب من باااااااااادرى…طق فى دماغ الراجل الملياردير..قام جاب الديب من ديله هو وواحد تانى – تقيل فى مصر برضة
دة توكيل ..ودة توكيل وقسمنا البلد نصين
دة موبينيل ..ودة فودافون – من الاخر- ماهياش فزورة اصلها !!
المهم
كان سعره فى الهاى هاى -2000جنيه وطالع !!
وبعدين واحدة واحدة ابتدى يرخص ..يرخص..لحد ما بقى ببلاش ..اقصد بتراب الفلوس !
100جنيه تجيب موبايل فلّه بينطق ويقول !
المسألة خدت ييجى 10سنين – من 1998وحتى 2008 عشان نوصل لمرحلة البلاط دى بالنسبة للاسعار
لكن وقتها – ايام ما كنت فى الجامعة – كان أملة ..ومحدش يقدر يمسكه غير الناس اللى فووووووووووق قوى قوى ! لكن دلوقتى بقى خلاص ..مع مقاطيع المجتمع وحثالات البشر !!!
ونجحت الحملة الاعلانية – اللى بتدّرس فى بعض كليات الاعلام لحد دلوقتى ..فعلا مش مبالغة –
حملة المحمول فى يد الجميع !!
البهوات والحراميّة..الرجالة والستات ..وحتى عيال الابتدائية ..الشيوخ والجدات ..حتى الباعة الجائلين ..اللى همّ رزق يوم بيوم ..بيطلعوا الاتوبيسات فى اليمين كرتونة البضاعة وفى الشمال موبايل !!
خلاص
فى مصر دلوقتى ..اللى ممعهوش موبايل ..زى الصعيدى اللى مابيدخنش أو اللى مفيش على وشه شنب !!..زى الشارع من غير عمود نور..زى العربية اللى من غير شكمان..زى الفلاح اللى معندوش حمار!!!
بقت مسألة حياتية استراتيجية تكتيكية استعباطية استهبالية على اعلى مستوى !!!
وبعد ما كان الموبايل ..يدوب تليفون لاسلكى وبس
بقى فيه كاميرا بتصور اللحظات السعيدة للى بنى ادم ..واللحظات النادرة فى حياته ..يعنى يكون ماشى ويقابل الفنانة تافها وهبى ولا انا دانا انا دندن ..ولا مروى تحرش ..ولا روبى بتاعت العجلة !!
او مثلا لو قابل سامبو زين ..او ريان يا فجل..او ماردونا النيل ..او بلاتينى السويس ..او بيليه سوهاج !!
او لو قابل الكاتب الفلتة ..او المذيع المعجزة ..أو …أو…..الى اخر نجوم المجتمع اللى بينورولنا حياتنا اللى غرقانة فى الضلمة !!
والموبايل بقى فيه راديو كمان – تقدر تسمع كل الاغانى الجديدة 24 ساعة ..وتعيش الحياة بنظرية الدنيا فرفشة نعنشة !!
والموبايل طبعا بقى ليه نغمات بولوبيف وبولوشيرت ..يعنى اللى يرن عليك تقدر رخم على جابوه باغنية بايخة او كوبليه يتعاد 18 مرة لحد ما ينسى هو كان متصل بمين !!
دة غير خاصية المولوتوف ..او المولوتوظ…اقصد البلوتوث ..اللى هو طريقة جديدة ع الزيرو يقدر بيعا الولد يظبّط البنات وهو مرمى مع شلة الهلس والدنس على اى كوفى شوب !
يبعت رسالة لكل اللى حواليه ..ميدو الرمّة…لحد ما ترد عليه كيكى التافهة ..ويشدوا حوار على الموبايل..وبعدين ..يلا بقينا صيّع ..اقصد اصحاب – بعد ما يتقابلوا فى كوفى شوب تانية !!
الغريب بقى
ان الموبايل بقى عنوان للطبقة الاجتماعية اللى انت فيها
وبقى عنوان على مستواك الحضارى ..بمعنى ..ياترى انت كول وستايل وروش طحن
ولا قفل وجلدة وايحة ومالكش فى التيتة !!!
تليفونك قديم وكسر ووشه كالح ..يبقى انت شرحه….ولا تليفونك رنته موضة وبيلعلط من الاكسسوار والدلع اللى انت حاطّه ؟!
وغنى عن الكلام ..ان تجارة الهوا فى مصر…او الكلام فى الهوا ..الموبايل بقت تجارة مربحةجدا
فبين كل محل موبايل وموبايل …محل موبايل !
وبين كل سنترال وسنترال…سنترال !
ونيجى بقى لموضوعنا – بعد المقدمة المملة اللى فاتت – اللى هو المستهبلات
اقصد البنات – احترم نفسك !
فمن الصعب جدا جدا جدا ان تجد بنت ليس فى شنطتها موبايل !
طب ونت ايه مشكلتك ؟؟؟ هو انت اللى بتدفع تمنه ؟؟!!!
لأ يا سيدى
اقولك مشكلته ايه …
مشكلته
ان انت تلاقى بنات فى ابتدائى واعدادى معاهم موبايلات !!!!!
بنوتة صغيرة فى حوش المدرسة وقت الفسحة ماسكة الموبايل وهاتك يا رغى
- ماما…المدرس زعقلى وضربنى
- انا هطيّن عيشته ..اسمه
- استاذ كريم بتاع العلوم
- ماشى ..انا هوريله شغله !..ها ..كلتى السندوتشات
- اه بكلهم اهوة
واى كلام فارغ بيتقال ..ولما يتسرق الموبايل من المفعوصة دى ..تبقى مصيبة ..طيب ما تحموا اولادكم…ثم خلاص ..هى ّ حبكت تشوفى كلت السندوتشات ولا لأ !!!!
وكذلك بنات اعدادى وثانوى
هات يا رغى على ميعاد الدرس ..والابلة نجاة الرخمة بتاعت المواد الاجتماعية ..وشريط عمرو دياب الجديد..و…و…و
ونيجى بقى للمصيبة اللى بجد …بنات الجامعة !
مقاطع بلوتوث فاضحة على موبايلات بعض البنات …ومقاطع صوتية قذرة لتقليد الرؤساء والمطربين !…وارقام الشلة كلها – ييجى 30اسم بنات وصبيان – وهاتك يا رغى فى بدنجان اسود !…وادفع يابابا !
المشكلة الاسود – من السواد
فين الاب ..ولا الام اللى عارف محتوى موبايل بنته !..طالما جابه واديهولها !!
وبلاش بقى الاجابة اياها ..بتاعت بنتى ونا واثق فيها !!!
بأمارة الاس ام اسسز sms- اللى مغرقة قناة ميلوطى هلس ومزّيكا وغيرها من القنوات السافلة !!
وصلت المهزلة
ان بقى فيه فضائيات على النايل سات والعرب سات - للرسائل التلفونية فقط !!
مطلقة من مصر – 39 سنة – تبحث عن مغفل جديد
انسه من سوريا – ملفوفة القوام – تبحث عن زوج ..ثرى ..وسيم ..ابيض ..وصوته حنيّن !!!
لبنانية – للصداقة الجادة !!
مغربية – تبحث عن عمل
و…و…و..و
واشياء يعف القلم عن كتابتها !!
الموبايل – يا كل اب ويا كل ام – ليس عليه رقابة من اى نوع !!
يا ترى عارفين بناتكم بيكلموا مين ..وبيسمعوا ايه على الموبايل …وبيشوفوا ايه على الموبايل ؟؟؟؟
حد فيكم عارف ؟؟؟؟؟؟؟؟؟
الارقام اللى مكتوبة وقدامها رشا وريهام ونورهان وسارة …و.و..و…و
يا ترى فعلا هم دول …ولا الاسماء الحقيقية ادهم ومحمد ومحمود وكريم ..وتنتاشر الف ولد ما تعرفش عنهم اى حاجة ؟؟؟؟؟!!!!!!!!
وبعدين ..حاجة اخيرة
الناس اللى بتتصور على الموبايلات – براحتها – وهى مش واخدة بالها
يعنى البنت اللى بترقص فى فرح والدنيا كلها بتصورها بالموبايل كاميرا …ما تزعليش لو لقيتى نفسك منوّرة على اليوتيوب ولا على اى سايت على النت !!!
يلى بتقلعى هدومك قدام صاحبتك وهى بتصورك عادى !! افتكرى الفنانة د-س-غ اللى العالم كله شافها !!
يلى بتعملى حاجة خاصة جدا – ايا كان نوعها فى البيت !- حذارى من تصويرك بالموبايل …يمكن تتطلقى …حتتبهدلى ساعتها !!
يلى بتقولى كلام خارج او مش خارج – مع اللى بيأفلم عليكى باسم الحب والغرام فى الموبايل – لو سجّلك يا حلوة …يبقى كل سنة ونتى طيبة !!!
يبقى الاحسن
نتقى الله
وان احنا نحترم اهلنا والناس اللى وثقت فينا – اما بالنسبة للاهل ..
فنفسى
الاقى الاب اللى بيفتش وبيدور وما تفوتهوش الفايتة !
لكن انا واثق فى بناتى والتخلف دة ..فسامحنى …أمّن ولا تخوّن ..
اعملوا اللى بقوله من غير ما اولادكم يعرفوا ..عشان الثقة ما تتهزش ..ساعتها اى مصيبة هتتلحق قبل ما تكبر وتبقى كارثة
قبل ما يبقى فيه جواز عرفى …و..تشويه سمعة …و.و.و.و.
فالوقاية
افضل مليون مرة …….من العلاج !!!
والى لقاء
عادل حجازى
13-4-2008
