المستهبلات فى امّها ( المائصات !!! )

بحثت فى معاجم اللغة العربية عن اصل كلمة مايصة .. ملقيتلهاش اى اساس

قلت مش مهم… يمكن متحورة عن الفارسية ولا التركية ولا غيرها

لكن نمشّيها مع بعض – على سبيل اهو كلام ابن خالة حديت –

ماص الرجل مياصةًًٌ فهو مايص اى مائص !!……..وهى مائصة…….وهم مائصون- غير نائصون-………وهن مائصات مائعات متدنجلات واخيرا…متستهبلات !!!!!!!

والمياصة يا اخوان هى الدلع المرء….الماسخ..اللى ملهشى عازة

الدلع الاسود..اللى هو المرقعة والاستعباط اللى من بلاده

دلع الفلاحة لما تقول شاليموه ..ودلع بنت الريف لما تقول ( دة بنى ادم اوفر) ودة موبايل مش ستايل !

..ودلع بنات الصعايدة لما تقول البوم اليسا مش جامد..وحازم امام امّور اوى

ودلع بنات مصر كلّهم لما يقلبوا الصاد سين والقاف كاف

ممكن اعرف شارع سلاح سالم من مدينة نسر فين ؟؟ و مسر بقت بلد درجة تاسعة مش من دمن – ضمن – الامم ولا ليها زكر ع الخريتة.. وسلامتها يا رقة !!

البنات اللى بيحاولوا يقلدوا طريقة طنط ماجدة الصباحى …وهى بتستموّت وهى بتقول لشكرى سرحان ….ولا رشدى اباظة….ممتوووووووووح…يا ممتووووح !!

او سهوكة هند رستم ..او سهتنة داليا البحيرى…او الست سمية الخشاب فى فيلم بحبك ونا كمان

المستهبلات فى امها عايشين فى دور انا باكل رقاق كتير قوى يا جماعة !!!

بسكوتات قوى المضروبين فى بطنهم !

فتافيت سكر قوى المهروشين فى عقلهم !!!

نفسهم يبقوا ستايل راقية ابراهيم ولا ليلى مراد - الرقة اللى بجد - بس بتقلب معاهم بالنماذج المشوهة اللى شايفينها ليل نهار فى التليفزيون

يا حلوين

دول ستات عمرهم ما سمعوا اكتر من كلمة حمار فى حياتهم

عمرهم ما ركبوا مواصلات وشافوا وسمعوا اللى بيحصل فيها

عمرهم ما مشيوا زيكم فى الشوارع والميادين

ماغسلوش مواعين..ولا مسحوا بلاط..ولاقشروا بصلة..لا نشروا الغسيل فى البلكونة

ولا وقفوا فى طابور من اى نوع..

دول ….موضوع تانى !!!

وعلى فكرة انتوا احسن مش همّا

بس خليكوا على طبيعتكو..وبلاش مياصة فى الكلام

لا هو حلال

ولا حتى لايق عليكم

…………………

عادل حجازى

عادل حجازى