شيل فرعونك ....( شعر عاميّة )
قبل اللُقمة ..وقبل الهِدْمة ..
امسك كل ولاد الهِرْمة !
قبل المتعة ..وقبل اللذّة ..
لازم تعرف معنى العِزّة .
قبل ما تعمل مرّة دماغ ..
شوف مين باع اعمارنا بصاغ .
قبل ما تضحك جوّه السيما ..
اُرْفُضْ انّك تبقى غَنيمة .
قبل ما تيجي وتمشي وتفرح ..
لازم تنسف..لازم تدبح !!!
شوف كده فكّر…ايه الفرق ..
بين الانسان وجميع الخَلْق
صحصح فُوق..اعلى لفوق
موش هاتعيش عمرك مسروق !
صحصح فُوق ..ربّك فوق
ما بيرضاش ظُلم لمخلوق .
ياللي بتلعن فى الهتّيفة
مهما تكون النيّة نضيفة
مانت َ هَتفت سنين للكورة
مع انّك كومبارس الصورة !
ياللى رَقصت كتير فى استاد
اهتف مرّة …ضدّ فساد
لا احنا عبيد …ولا هُمْ اسياد
شيل فرعونك ذي الاوتاد !
قبل التوهة ..وقبل الغَرْقة
اخرس خالص لو موش فارقة
سيب الناس الفارقة معاها
اللي بتزرع بور ..بدماها
اللي بتهدم جبل الباطل
وتنوّر بالحق سماها
ياللى بتلعن ناس فى ( ميدان )
انت ضعيف ومريض وجبان !
ياللى بتلعن ناس فى ( ميدان )
انت عبيط وفقير ومُهان !
لا احنا عبيد …ولا هُمْ اسياد
شيل فرعونك ذي الاوتاد !
قوم هيلا هيلا ..وشيل الشيلة
لِمّ الناس والبيت والعيلة
قرّب منّى ..تعالى يا خويا
ناخد تار ..امّك وابويا
عارفك طيّب..بس غّشاوة
تلاتين سنة عايشين فى غباوة !
شوف كده فكّر…ايه الفرق ..
بين الانسان وجميع الخَلْق
صحصح فُوق..اعلى لفوق
موش هاتعيش عمرك مسروق !
صحصح فُوق ..ربّك فوق
ما بيرضاش ظُلم لمخلوق .
عادل حجازى
تعليقات
إرسال تعليق