المستهبلات فى امها " اليويو " !!
اليويو
هو لعبة صغيرة وممتعة ومشهورة بين الأولاد في كل العالم. يتكوّن ليويو من قطعتين دائريتين (من الخشب أو المعدن أو البلاستيك) وقطعة واحدة طويلة من الخيط.
يضع مستعمل اليويو طرف الخيط على إصبعه ويقذف اليويو نحو الأرض. القطعتانالدائرتان تدوران على طرف الخيط الآخر. ثم اليويو يعود إلى يد
الشخص الذي قذفه
المهم ان هذه الكرة المطاطية – أو ايّا ما كانت مادة تصنيعها – تتذبذب وتتأرجح من اعلى الى اسفل ومن اسفل الى اعلى ….من العلو الى الانحطاط ….ومن الارض الى السماء والعكس بالعكس !!!
طب ايه علاقة اليويو بالبنات ؟؟؟!!!
علاقة وثيقة جدا (ببعض ) البنات مش ( الكل ) طبعا …بكل تأكيد .
فيه بنات زيّها زى اليويو !
حبّة فوق ..وحبّة تحت …على رأى الفيلسوف العملاق احمد بن عدوية !!
شويّة
…. حجاب وحضور دروس دينية وحفظ قرآن وماشية مع بنات زى الورد ..وعمّاله تزيد وتعلى يوم بعد يوم …ومفيش اختلاط اهبل …ولا مصاحبة …ولا كلام سافل وضيع …ولا غيبة …ولا نميمة….وحاجة زى النسمة فى البيت …ايدها بايد مامتها فى كل حاجة ..وملهاش صوت …وحاضر يا ست الكل…ومن عينى يابابا …وحاجة آخر عظمة ..بلسم…دوا…شفا….حاجة تتحط على الجرح يطيب !!!!
وشويّة ..
مفيش لا حجاب ولا غيره …مكياج ( راجع ادراج المتمكيجات ..جه منّه سؤالين السنة اللى فاتت !!)…ومحزّق وملزّق ( راجع ادراج بناطيل البنات …عشان حييجى فى الامتحان آخر السنة دى !!!)…..ومياعة ومياصة ( راجع ادراج المائصات ..برضو يمكن ييجى منّه سؤال فى الامتحان !!!!)…..واختلاط اهبل مع كل من هب ودب …الصايع والمؤدب …ولاد الناس ..وولاد ال…..ولا بلاش ! ومشاوير غبرة من ورا الاهل …ومصاحبة …واخلاق زى الزفت …غيبة ..ونميمة …وفشل فى التعليم .. وكل يوم نجرّب ونروّش فى حاجة جديدة مع الشلة
سجاير…ممكن
شتايم بالاب والام زى الولاد ما بيعملوا…ممكن برضو
كلام سافل ومواضيع من اياها ..ونكت من اياها …ووصل الامر الى سيديهات من اياها ..ممكن جداجدا ( ما تبقيش لخمة ودقة قديمة …البنت لازم تعرف كل حاجة !!)
وفى البيت …مفيش احترام للاب وللام ..فى وجودهم ..وفى غيابهم …ولا نعم ..ولا حاضر..ولا مساعدة من اى نوع فى اعمال المنزل …عشان انا ورايا مذاكرة ( قصدها شات ع النت ..وقراية مجلات تافهة )…او عشان انا تعبانة ياماما ( قصدها رجلى متكسّرة من كتر المشى مع الهفأ اللى بتتضحك عليه أو بيضحك عليها ما تفرقش !!)
وحاجة ايه …اخر قرف …حاجة كدة …تتحط على الجرح يهيج !!!!
النهاردة مثلا ..قابلت نموذج مثالى للبنت اليويو !!
فى ميكروباص ..المقعد الخلفى الاخير…كنا تلاتة !!!
انا ..وولد من ابو تي شيرت كاشش ..يعنى يدوب على نص البطن ..بشرط انه اول ما يوّطى يجيب حاجة من على الارض ..التى شيرت يترفع لفوق ويبيّن البوكسر الملوّن اللى تحت البنطلون الساقط !!!….بيسمّوه (low waist ) يعنى الوسط المنخفض …او الساقط….زى صاحبه !!!!….وجنب منّه بنت لابسة اسدال !!
حاجة عظمة اهوه …اسدال…يعنى زى اسلامى فضفاض واسع لا يصف ولا يشف …تمام قوى !
اللى مش تمام بقى …الحوار اللى كان بين جوزين الكناريا اللى مكمّلوش العشرين ربيعا !!!
- انتى كل اصحابك ولاد ؟؟؟!!!
- آه ..لأن بصراحة البنات ما بيخدموش …أندال ( يا حرام ! )
- ايوة بس دة مش طبيعى .. ( يا واد يا طبيعى !!) المفروض ان انتى بنت يعنى ترتاحى اكتر لصحوبية البنات ( يا سلام ياض يافيلسوف !…شكلك قارى مجلة ميكى ع الصبح !! ) !!
- المفروض ..بس من ايام الابتدائى ونا مجرّبة البنات ..دايما بيستندلوا ! ( آه..ياجبابرة !!)
- اوكى ..بس غريبة شويّة ( راسى قوى وعاقل قوى يا فوفو !!)
- تعرف امبارح ونت بتكلمنى على الموبايل ..كنت بملى البانيو ميه سخنة ( طب وحنا مال ابونا ؟!!!!)
- معقولة ؟ ( ياض يا مندهش !!)
- كنت قافلة باب الحمّام …وماما عمّاله تقولى خلّصى بقى ( خلصت روحك يا بعيدة !!)
- ونا اقول برضو ( تقول ايه يا فوفو ..دنت مش عارف تقول كلمتين من الصبح !!!)
- وبعدين لما خرجت ما كنتش عايزة انام جنب ماما…حاكم بابا…بيحب ينام فى الصالة تحت المروحة ..واخواتى بيرفصوا وهم نايمين !…فجابولى سرير صغير عشان انام فيه…لقيت ماما بتقول تنامى جنبى …وكل شوية اقوم من جنبها عشان اكلمك فى الموبايل !!! المشكلة كلما ماما تقوم ما تلاقينيش ..اقولّها كنت فى الحمّام .هاهاهاها ( خفيفة قوى المضروبة !!)
الغريب بقى
واحدة لابسة ( اسدال ) وبتقول لولد.. حمام وسريرى و..و.. يبقى ايه النظام ؟؟؟؟!!!!
يا هبلة ….يا بتستهبل !! ونا اختار انها بتستهبل !!
طب الشاطرة – والشاطر باللغة العربية الفصحى معناه اللص !-
الشاطرة دى لابسة الاسدال ليه ؟….طالما انها مقضّياها ..والمكياج اللى على وشها معناه انها ما بتصلّيش اساسا !…لأنها لو حتتوضى يبقى المكياج حيروح …وطالما مكياجها ماراحش …يبقى ما بتتوضاش ..يعنى ما بتصلّيش !!
يبقى لابساه لسبب من تلاتة
ابوها اصر عليه – غصب عنها يعنى !
أو عشان تتجوز ..على اساس ان الشباب كله بيقول انه بيبحث عن زوجة متدينة ..واهوه…اسدال..يعنى تدين !!
أو عشان شعرها وحش !!!!!!!!!!
وقبل ما حد عبقرى يتهمنى انى ضد الاسدال او الحجاب او النقاب يقرا ادراجى تحت ( عنوان المناهضات للحجاب )
فالزى الاسلامى هو اشرف واطهر وازكى زى للبنت – دون نقاش !
المؤلم
ان يندرج تحت لواءه من لا يفهم معناه ..ولا يقدّر وقاره ..ولا يشعر بعظمته !!
ولكنها نماذج اشبه باليويو !!
عين فى الالتزام والاحترام والاحتشام والتدين !
وعين فى الترويش والانفلات والموضة ..وكل الناس كدة !!
شوية فى اعلى سموات الفضيلة …وشوية فى سابع ارض المعصية !!!
وهذه المرجحة – من التأرجح – الفكرية والشعورية والسلوكية …نشاهدها فى عشرات السلوكيات الصغيرة والكبيرة فى مجتمعاتنا !
فنانة تلبس الحجاب وتقلعه !
وبنات مذبذبة بين تقليد بنات الطبقة الهاى كلاس – اللى هم اساسا ماشيين ورا امريكا واوربا فى كل تقاليعهم وافكارهم ..الا من رحم ربى – وبين واقعهم الذين يعيشونه …امهات بسطاء فى الزى وفى السلوك …عايشين بنظرية ايّام وبتعدّى !
تناقضات مريضة بين الواقع – اللى البنت مزروعة فيه - وبين الوهم اللى بيطاردها فى التليفزيون وقنوات الفيديو كليب والجرايد والمجلات بروعة الحياة على الطريقة الامريكية
البوى فريند
والشات
والموبايل
والام بى ثرى اللى مابيفارقش الودن
والهوس بعالم الفن والفنانين
والعيش 24ساعة على مبدأ الامريكان
Life is too short!!
كل الاهتمام بمجال الحس والحواس والغرائز !
ان يصبح الخروج الى كنتاكى وماكدونالدز اهم وامتع من الذهاب الى المسجد !
ان تصبح قاعة السينما أو المسرح ( اهم ) من قاعة العلم والدراسة !
ان يصبح الانترنت الصديق الاوفى والاصدق للانسان !
ان تصبح لغة (الصورة ) هى الاهم والاجدى من لغة (السطور ) المكتوبة فى كتاب او صحيفة !
ان تصبح الحياة الزوجية (قيد) ثقيل يأباه الانسان ( الذكى ) على نفسه !!
ان تصبح نظرية (النفعية ) هى المسيطرة على كل المعاملات ..او ما يعرف بالبراجماتية ..فكل ما هو نافع مباح….بغض النظر عن اخلاقيته !!
الى عشرات الافكار التى يعلمها الجميع …والتى يروّج لها السفهاء منا بعلم او دون علم !
ولتعى كل فتاة هذه الآيات الكريمة جيدا
“”" إِنَّ الْمُنَافِقِينَ يُخَادِعُونَ اللَّهَ وَهُوَ خَادِعُهُمْ وَإِذَا قَامُوا إِلَى الصَّلَاةِ قَامُوا كُسَالَى يُرَاءُونَ النَّاسَ وَلَا يَذْكُرُونَ اللَّهَ إِلَّا قَلِيلًا (142) مُذَبْذَبِينَ بَيْنَ ذَلِكَ لَا إِلَى هَؤُلَاءِ وَلَا إِلَى هَؤُلَاءِ وَمَنْ يُضْلِلِ اللَّهُ فَلَنْ تَجِدَ لَهُ سَبِيلًا (143) “”
سورة النساء
فهذه الذبذبة ( المخيفة ) قد تجعل الفتاة فى النهاية من الفئة التى يصفها المولى عزّوجل بالنفاق
لا الى هؤلاء – اى المؤمنين …..ولا الى هؤلاء اى الكافرين – والعياذ بالله
ومعلوم ان المنافقين فى الدرك الاسفل من النار …فهل تقبل (عاقلة ) هذا المصير لنفسها …وهل يقبل كل اب أو ام هذا المصير لابنته ؟؟؟؟
هدى الله الجميع ..ورحمنا برحمته ..وهدانا الى صراطه المستقيم ..اللهم آمين .
والى لقاء – باذن الله
عادل حجازى
Acc_adelhegazy@yahoo.com
تعليقات
إرسال تعليق