عجائب الدنيا المصرية(1) !! ( مصر اللى مش فى دماغها )

كتبهاعادل حجازى ، في 19 أكتوبر 2009 الساعة: 11:31 ص

 فى الشوارع

 

** انك تلاقى شارع طويل جدا مليان شجر والشمس فى السما مش باينة من كتر الشجر !!

 

**انك تلاقى ناس مستنيّة الإشارة  تبقى حمرا عشان تعدّى !

 

**انك تلاقى شارع مطبّاته محطوطة فى مكانها الصحيح فعلا !

 

** انك تتوه ..وتلاقى واحد يدلّك على العنوان صح ( معجزة )..انّه يقولّك مش عارف ( خارقة من الخوارق !)

 

** انك تلاقى دورة مياه عمومية ببلاش (معجزة)..نضيفة وتصلح لاستخدام الحيوانات مش البنى ادمين ..( عجيبة من عجائب الدهر ) !

 

** انك تلاقى شارع ضلمه ..مفيهوش ولد وبنت مستهبلين فى امّها !

 

** انك تلاقى اسماء شوارع لشخصيات معروفة ..غير حارة العبيط ..وشارع الدهولّ..وسكة البغّالة !!

 

** انك تلاقى شارع تعرف تركن فيه – لو بتاع عربيات يعنى ! – بعد الساعة 9 الصبح !

 

** انك تلاقى شارع ..وسبحان الله ..فيه محلات بتبيع كتب غير فروع الهيئة المصرية للكتاب !

 

** انك تلاقى شارع مفهيوش غير عشر قهاوى بس !!

 

**انك تلاقى شارع مفيهوش غير تلات محلات موبايل بس ..باكسسواراته بسشواراته ببوكسراته بهَجْصْ راته !!! 

 

**انك تلاقى شارع مفيهوش ولا محل بيبيع أكل !!

 

** انك تلاقى شارع مفيهوش حد فارش فرشة عليها عيش بلدى ..والمعجزة ..مفيش دبّان على العيش !!

 

** انك تلاقى شارع الرصيف بتاعه سليم ويصلح للمشى ومفيش عليه بياعين بيبيعوا اى حاجة ممكن تتخيّلها …باتنين ونص ..وتعالى بص !!!

 

** انك تلاقى شارع تتفوّق شهرته فى الهلس السرى غير شارع جامعة الدول العربية !!

 

** انك تلاقى شارع خالى من الحركة والحياة قبل طلوع الفجر !!

 

** انك تلاقى شارع فيه محل بيفتح جديد.. ومش مشغّل دى جى مِلَسْوَع بيه ودان اللى رايح واللى جاى ..أو فيه صوان عزا ..وصوت المقرىء مش جايب لحد وهران فى الجزائر ..أو صوت فرح ..أو زفة ..مش جايب لحد طنجة فى المغرب !!

 

** انك تلاقى شارع نضيف !

 

** انك تلاقى شارع ..ونت ماشى فيه ..جبته من اوله لآخره ..من غير ماتسمع  شتيمة واحدة ع الطاير تخرم ودنك !!

 

** انك تمشى فى شارع تلات دقايق على بعض من غير ما  تصادف واحدة لابسة محزّق وملزّق ومهزّق !!

 

** انك تلاقى شارع ..السكان اللى فيه عارفين بعض !!

 

** انك تلاقى شارع ..محلاته كلها بتقفل وقت الصلاة !!

 

** انك تلاقى شارع ..مفيهوش سايبر للفيديو جيمز بس !!

 

** انك تلاقى شارع مفيهوش سايبر برضو ..بس كل المراهقين اللى جوّاه مش داخلين على مواقع سكس !!

 

** انك تلاقى شارع متسفلت صح وبضمير !!

 

** انك تلاقى شارع مفيش شبّورة غبار و تراب رائعة جايباه من فوقيه لتحتيه ..كأنك فى ساحة الوغى فى معركة داحس والغبراء ..أيّام الجاهلية !!

 

** انك تلاقى شارع مفيهوش شباب واقفين على الناصية وبيفرزوا كل أنثى معدّية ..ويشوفوا تستاهل تحيّة ..يعنى معاكسة اطراء طريفة ..أو شكلها وحش ..فتستاهل تريأة ع الطاير ..أو هشكة ..فتستاهل نشوف ساكنة فين ..وحوارها ايه !!

 

** انك تلاقى شارع ..البنات بتوع ثانوى بعد ما خلصوا الدرس الخصوصى ..ماشيين دوغرى ..من غير حركات بنات الفيديو كليب ايّاها !!

 

** انك تلاقى شارع ..الناس اللى ماشية فيه ..كلها رضا وسعادة وتفاؤل ..مش غضب الله مرسوم على وشّهم !!

 

** انك تلاقى حد فارق معاه الكلام اللى انا قلته فوق دة ..ونفسه يوصل لمنصب ..أو ..يبقى فى قدراته انّه يعمل حاجة ويغيّر الواقع اللى زى ال……..

 

ولا بلاش !!

 

…………..

 

انتهى الجزء الأول !!

 

……..

 

يُتبع !!

 …………..

 

acc_adelhegazy@yahoo.com

أضف الى مفضلتك

• 
• 
• 
• 
• 
• 
• 
• 
• 
• 
• 

ـــــــــــــــــــــــــــــــــــــــــــــــــــــــــ
التصنيفات : مصر اللى مش ف دماغها !!!, مقالات | السمات:فيديو كليب, كليب, كليبات, وهران, قهاوى مصر, موبايل, مراهقين, مطاعم مصر, مطبات مصر, مصر, مصريين, مصريون, مصريات, الفيديو كليب, المستهبلين فى امّها, المستهبلات فى امها, المصريين, المصريون, الجزائر, بنات مصر, بنات ثانوى, سايبر, شوارع مصر, شارع جامعة الدول, شارع جامعة الدول العربية, طنجة
أرسل الإدراج  |   دوّن الإدراج  

40 تعليق

40 تعليق على “عجائب الدنيا المصرية(1) !! ( مصر اللى مش فى دماغها )”

1. مسلم يرجو الدعاء قال:
   أكتوبر 19th, 2009 at 19 أكتوبر 2009 11:47 ص
   العزيز عادل حجازى
   رغم كل المساؤى اللى قولتها دى بس مش عارف ليه الشوارع دى بحس إنهاأحسن من أى شوارع فى الخارج
   بحس فيها بروح المصرى اللى نفسه كل حاجه تتغير بس مش عارفين ودا عيبهم لإنهم للأسف كل واحد بيقول غيرى يغير )ويطور (وأنا مالى مع أنه هو اللى المفروض يبدأ بنفسه
   بس إنا عندى أمل وحاسس إنه إن شاء الله هييجى اليوم اللى ييجى فيه اللى يغير بجد ويخلى مصر ترجع زى زمان أيام ما كانت بييجى ليها الناس من كل مكان علشان يتعلموا من أهلها
   تحياتى ……وتقديرى
   فى إنتظار الجديد متتأخرش على ياكبير
   
2. مجهول قال:
   أكتوبر 19th, 2009 at 19 أكتوبر 2009 11:53 ص
   استاذ عادل
   هذاهو نتيجه حتميه للفسادالمستشرى والمتغلغل فى اوصال الدوله والمجتمع من جانب المسؤلين والفراد فكل واحد يعمل اللى يعجبه وتظ فى الباقى ميهمش اى حد وكل شئ بالفلوس وأصعب حاجه ممكن تتحل بالفلوس ..ومعاك فلوس تدوس ..دوس ولا يهمك ..اللى هايكلمك ..ميهمكش منه ومن الحكومه ماانت بتدفع هو ده المهم ..اصبح الأدب جبن والشهامه تهور ..والصياعه هى الأدب وإنك تزعق وتشتم بأقذر الألفاظ والبلطجه هى الحل واللى تقدر تاخده بدراعك اوعى تسيبه لحد تانى يخده وتبقى انت الهفأ…وإنا لله وإنا إليه راجعون…ولا حول ولا قوة إلا بالله
   
3. نسرين قال:
   أكتوبر 19th, 2009 at 19 أكتوبر 2009 3:15 م
   عادل حجازى قال:
   أكتوبر 19th, 2009 at 19 أكتوبر 2009 1:47 م تحرير
   دعـوها ،
   هذه الوحيدة في البحر
   تأخذنا لجرحهـا الفاتك، وتعطي غرورها بهجة الأشرعـة
   الوحـيدة في البحر
   كأن المراكب لا ترى الأفـق إلا موصـولاً بهـا.
   دعــوها
   تسـورها شهامة الأسمـاك
   وتفخر بها الصواري المنـتـورة مثل رسائل الماء .
   لأجلـها بجـلت زعفـران الأقاصي
   مدحت الأبيض لينسـاب مثل غنج الساحرات
   وهـن يخلعن الفتنـة على السفن.
   آخيـت حجـر المينـاء
   وصليت لأجلهـا ، الوحيـدة في البحــر
   تضـرعت أن تظل وحيدةً تكسر الريح
   وتعيد لموج الهجـوم خيولها الجامحة
   لتظل وحيدةً مثل حصنٍ .
   ……………
   …………….
   شعر : قاسم حداد .
   ……
   تحياتى .
   /
   /
   /
   /
   السلام عليكم ورحمة الله وبركاته اخي عادل شكرا لك للكلام الجميل والمرور الجميل
   دمت في امن الله
   محبتي
   
4. Dark Flash قال:
   أكتوبر 19th, 2009 at 19 أكتوبر 2009 5:44 م
   السلام عليكم ..
   عادل حجازى قال:
   أكتوبر 19th, 2009 at 19 أكتوبر 2009 2:49 م تحرير
   فى انتظار الاجابة .
   ……
   تحياتى .
   ______________________________
   الأخ العزيز .. كيف حالك؟
   الاجابة ظهرت في التعليقات ..
   أيامك صفاء (0)
   
5. Dark Flash قال:
   أكتوبر 19th, 2009 at 19 أكتوبر 2009 5:48 م
   السلام عليكم ..
   انا اقرأ لقاسم حداد ايضا .. يبدو أنك صاحب مزاج رائق!
   كن بخير (0)
   
6. haleemh nor قال:
   أكتوبر 19th, 2009 at 19 أكتوبر 2009 6:06 م
   ههههه
   كل كلامك صح ياريت الشعب المصري نفسه يحاول يصلح من نفسه لكن دلوقتى ولا حكومة ولا شعب عايزين إصلاح خلاص اتعودنا على الفساد والخيبة اللى احنا فيها بتكبر بس عادى مش فارقه معانا احنا شعب حمول يستحمل جبال ولا نقدر نتكلم ولا عايزين نتعلم ..مقال بجد جميل جدا ….شكرا لك
   حليمة
   
7. loly قال:
   أكتوبر 19th, 2009 at 19 أكتوبر 2009 7:53 م
   الزميل عادل حجازي لو ماكنش كل ده موجود يبقى انت اكيد مش في مصر ومش من مصر هههههههههههه وبلاش ندوس علي الوجع اكتر من كده بقى. عارفين والله بس خلاص جسمنا نحس وعنينا نشفت دموعها من كتر البكاء
   تحياتي زميلي ولوني عاتبة علي انقطاعك عن مدونتي الذي دام طويلا . عموما ادعوك لادراج جديد لم تره مثل الباقين واتمني ان تراه هذه المرة وانتظر رأيك
   دمت بخير
   
8. مجهول قال:
   أكتوبر 20th, 2009 at 20 أكتوبر 2009 12:14 ص
   ياريت تتكلم عن اشارة جسر السويس
   
9. ياقوت القلوب قال:
   أكتوبر 20th, 2009 at 20 أكتوبر 2009 3:33 ص
   أخي عادل حجازي
   طيب الله أنفاسك
   اغيب كثيرا بل أغيب عمرا
   وأجدك أنت أنت بنفسك كتاباتك
   التي تقرء من نهاياتها لتدرك
   كم هي جميلة بدايتاها
   
10. ياقوت القلوب قال:
    أكتوبر 20th, 2009 at 20 أكتوبر 2009 3:38 ص
    صفعات مدويه تركل بها واقعنا الفج والمرير
    صور تتكرر وتجاهر بعنجهيه
    وكثيرا نخدع بسذاجه ونكون ضحيه
    للزيف والتلاعب على الحبال
    وخزات توقظ اصحاب الضمائر الحية ممن يقرأون نصك
    لكن من سيوخز اولئك النائمون حد الموت في غفلتهم
    احترامي وتقديري
    
11. gamgom412 قال:
    أكتوبر 20th, 2009 at 20 أكتوبر 2009 10:26 ص
    كل الكلام اللى حضرتك بتقولة صح مية مية
    
12. ابوجلال الخميسي قال:
    أكتوبر 20th, 2009 at 20 أكتوبر 2009 11:26 ص
    السلام عليكم
    الاخ الكريم عادل اولا تقبل مرورى على مدونتك الكريمه الطيبه
    وثانيا لا اخفى عليك ان اسمك اول ما جذبنى للمدونه بسس ان احد اصدقائى المقربين فى مصر ويقطن بميت عقبه يدعى عادل حجازى
    ولا اعرف ان كنت انت ام لا ولكن عندما دخلت لمدونتك وجدت بها ما يستحق الاشاده والتعليق
    فتحياتي
    ماذا تبقى ؟؟؟ بعدما باعونا؟؟؟
    ——————————————————————————–
    عندما تكلم مفتينا عن الحجاب
    وصرح زعيم السينما والمسرح عادل امام عن الحجاب
    .. ولا اعر ف لماذا ذكرت ما يحدث فى فلسطين
    ولكن مشاعرى خرجت منى فحاسبونى عليها لكن لا تمنعونى عن الكلام
    يبيعونا لأننا احرار
    مارضينا زل ولن نرضى بعار
    مفتينا كل يوما يخرج لنا شعار
    يقول حجابك اختى لم اخذ فيه قرار
    وزعيم شاشتنا صاحب الافكار
    يقول من قال اجبار ظنه ان الحجاب
    امرا فيه اختيار
    يبيعوننا لأننا احرار
    من سافر منا منسي
    تارك للديار
    من ليس ديمقراطي غبى
    او من حزب الفجار
    يروننا حثاله لاننا نملك الاختيار
    ان نقول لا
    ان يكون لنا شىء من الاسرار
    يصادروا الرأى فينا
    ويسكتونا بالخطط الخماسيه ووعود من
    طيف شرار
    واخواننا فى القدس
    باعوهم وقالوا نقدم الاعتذار
    سمحوا لليهود بتخريب الديار
    حكامنا سيجتمعون يوما
    ليسئلوا عن حفله المساء
    كم كان الحضور على المسارح
    او بالساحة العراء
    من حضر ومن اعلن الاستياء
    هل غنت روبى ام نانسي ام شدت هيفاء
    وفى النهايه يسئلون هل وقفتم
    دقيقه حداد
    على من مات
    وينسون انهم باعونا
    ومن انفسنا اغضبونا
    وفى ارضنا قد نفونا
    فكيف نسكت على من كذبونا
    وفى الوهم اوهمونا
    لكننا احرار لم نرضى زل
    ولن نقبل بعار
    لن ننسى تعاليم السماء
    الخير بين والشر بين
    وكلنا ياسيدى
    كلنا
    الاموات والاحياء
    عند الله سواء
    عند الله سواء
    
13. ايمان حلمى قال:
    أكتوبر 20th, 2009 at 20 أكتوبر 2009 11:57 ص
    هههههههههههه
    يا عينى ده انت زى حالاتى مركز فى امها
    ههههههههه
    ماتنساش الحلقه اللى جايه
    انك تلاقى محطة مترو مافيهاش شبه راجل واخد الموزه تحت دراعه والخلق ساكت!!!!!!
    انك تلاقى شاب يقف ويقعد راجل كبير
    انك تلاقى عماره مش ناشره الغسيل وبدون مداراة للملابس ال…….
    ولا ااقولك اسيبك انت تكمل
    بس فعلا هم يبكى وهم يضحك
    هههههههه
    ربنا معاك
    اللى زيك تعبان(مش مبسوط يعنى) فى حياته جداااااااا
    
14. نادية العسري قال:
    أكتوبر 20th, 2009 at 20 أكتوبر 2009 1:27 م
    أخي عادل
    أشكر لك مرورك الكريم
    والأبيات الجميلة للشاعر جمال مرسي
    تحياتي ومودتي
    
15. mahmoud saeed قال:
    أكتوبر 20th, 2009 at 20 أكتوبر 2009 3:29 م
    أخي عادل حجازي
    طبعا انت مستغرب ردي عليك لاني نادرا لما ادخل واعلق على حد لاني مش فاضي اني ادخل أي خناقات مع حد ميستهلش تضيع وقتي عليه
    المهم أن موضوعك جميل ومستفز
    جميل لينا أحنا المصريين يمكن نصحصح شوية ونعرف الطريق منين
    وجميل برده لكل واحد نفسه يشوف مصر الحقيقية الغنية بأولادها
    بس للأسف الموضوع برده مقلق جدا جدا
    ليك انت انت وبس علشان انت عارف بقى احنى في مصر
    ممنوع تقول كلمة حق حتى لو كانت من عجائب الدنيا
    حبيبي عادل مش هقدر اطول بس بجد رائع ومتميز دائما
    واتمنى ننام ونقوم من النوم عجائبك تكون حقيقة وبدل لما مصر اللي مش في دماغها تبقى مصر اللي في عيوننا
    
16. نهاد فتحى قال:
    أكتوبر 20th, 2009 at 20 أكتوبر 2009 6:40 م
    والله لو نفسك قوى تشوف الشوارع بالطريقة دى ممكن تنام نومة طويلة شوية وتحلم حلم طويل شويتين وتشوف كل اللى نفسك فيه فى الحلمبسيطة مش كده
    
17. ابن البلد قال:
    أكتوبر 21st, 2009 at 21 أكتوبر 2009 4:15 ص
    __________________________________________
    تبقي انته اكيد في مصر يامعلـــــــــــــــم
    __________________________________________
    **الناس مستنيّة الإشارة بقالها 30 سنه ( ولسه لامؤاخذه حمرا )
    **الممطبّات مكانه صح ( الشارع اللي اتحط غلط )
    ** محدش بيتوه في البلد لان ( البلد اللي تاهت منا )
    ** البلد بقت دوره مياه ( عموميه كبيره )
    **لو مشيت في ( شارع نور) ..مش هاتشوف ولد وبنت مستهبلين فى امّها !
    ** الشوارع واسعه انته اللي ( مش بتعرف تركن وتاخد الجركن )
    يتبع …
    ابن لامؤاخذه
    البلد الناحيه التانيه
    
18. مجهول قال:
    أكتوبر 21st, 2009 at 21 أكتوبر 2009 12:36 م
    زي الفل ياعادل
    
19. عادل سعيد قال:
    أكتوبر 21st, 2009 at 21 أكتوبر 2009 8:23 م
    تلاقى فى شارع عشرين يافطة حزب
    لكن
    مفيش حزب واحد
    و الحزب الواحد
    ما تلاقيه كمان فى الشارع
    وراء باب مغلق
    تبقى انت فعلا فى مصر
    المحروسة
    
20. إيمان قال:
    أكتوبر 21st, 2009 at 21 أكتوبر 2009 9:43 م
    انك تلاقى حد فارق معاه الكلام اللى انا قلته فوق دة ..ونفسه يوصل لمنصب ..أو ..يبقى فى قدراته انّه يعمل حاجة ويغيّر الواقع اللى زى ال……..
    لذلك اغلب دولنا العربية ( مش بس مصر ) ستبقى على حالهالأنه احنا رافضين نتغير !
    شكراً لمرورك على مدونتي
    تحيتي و تقديري لك
    
21. عادل حجازى. قال:
    أكتوبر 22nd, 2009 at 22 أكتوبر 2009 10:35 ص
    مسلم يرجو الدعاء
    ونا كمان بحبها ..رغم المسخرة دى كلها
    بس مش زيك
    اكتر منّك مليون مرّة !!
    ……..
    احترامى
    
22. عادل حجازى. قال:
    أكتوبر 22nd, 2009 at 22 أكتوبر 2009 10:39 ص
    مجهول 2
    للأسف ..معاك حق فى كل كلمة قلتها
    للأسف
    تحياتى .
    
23. عادل حجازى. قال:
    أكتوبر 22nd, 2009 at 22 أكتوبر 2009 12:08 م
    أتفهّم تماما عدم تعليقك على الإدراج !!
    فلا زلنا نعمل جميعا بنظرية ..ادعى على ابنى ..واكره اللى يقول آمين !!
    مقال ينتقد أوضاع مصر..وبعدين لو حد مش مصرى قال مية مية وتمام
    ..حيتفهم انّه فرحان وشمتان فى مصر !
    ومن قلبى
    أرحب بكل كلمة حق ..
    لصالح بلدى ..التى هى أيضا بلد الآخرين ..لأن ( كل ) أوطاننا العربية
    ..هى أرض ..يجب أن تكون قائمة على هدف واحد
    لا أعرف غيره
    ولا أفهم غيره
    هو
    إعلاء راية ..لا إله إلّا الله ..محمد رسول الله
    كل كلمة حق ..بتدفع للأمام ..وبتكشف الحقايق ..وبتحاول تغيّر اللى
    احنا فيه .
    كل كلمة حق ..من أى حد .
    ………
    تحياتى .
    
24. عادل حجازى. قال:
    أكتوبر 22nd, 2009 at 22 أكتوبر 2009 12:08 م
    dark flash
    شكرا لزيارتك
    تحياتى .
    
25. عادل حجازى. قال:
    أكتوبر 22nd, 2009 at 22 أكتوبر 2009 12:10 م
    loly
    لازم ندوس على الوجع اكتر واكتر
    ومرحبا بعودتك للتدوين
    تحياتى
    
26. عادل حجازى. قال:
    أكتوبر 22nd, 2009 at 22 أكتوبر 2009 12:11 م
    المجهول 8 !!
    طيب ممكن اتكلم عن مزلقان الدويقة احسن ؟
    
27. عادل حجازى. قال:
    أكتوبر 22nd, 2009 at 22 أكتوبر 2009 12:13 م
    الراقية / يا قوت القلوب
    من قلبى
    اشكرك على كلماتك ..وأرجو أن أكون عند حسن ظنّك بى
    تحياتى لك
    سلامى ..و…احترامى
    
28. عادل حجازى. قال:
    أكتوبر 22nd, 2009 at 22 أكتوبر 2009 12:15 م
    gamgom412
    شكرا لاهتمامك وتواصلك
    تحياتى
    
29. عادل حجازى. قال:
    أكتوبر 22nd, 2009 at 22 أكتوبر 2009 12:15 م
    الأستاذ / أبو جلال الخميسى
    تشرّفنى صداقتك سيّدى
    لكنه تشابه أسماء
    أشكرك أخى الكريم
    وأهلا بك دائما .
    
30. عادل حجازى. قال:
    أكتوبر 22nd, 2009 at 22 أكتوبر 2009 12:16 م
    الاستاذة / ايمان حلمى
    ههههههههه
    و على فكرة ..انا خدت واحدة من اقتراحاتك فى الادراج التالى ..عن
    المواصلات !
    ومفيش حقوق ملكيّة فكرية
    ههههههههههههه
    نوّرتينى بزيارتك .
    تحياتى .
    
31. عادل حجازى. قال:
    أكتوبر 22nd, 2009 at 22 أكتوبر 2009 12:16 م
    صديقى العزيز محمود سعيد
    كثيرون مثلك انسحبوا من مكتوب يا صديقى
    بل
    وتركوا التدوين للأبد !
    وفعلا
    هذه الخناقات والمهاترات ( الساذجة ) ..صعب ..ان أى حد يتحمّلها !!
    مش عارف اقولك ايه ..
    بس انت اكيد ..ارتحت !!
    
32. عادل حجازى. قال:
    أكتوبر 22nd, 2009 at 22 أكتوبر 2009 12:17 م
    الأستاذة / نهاد
    يعنى حنقضّيها أحلام وبس ؟
    
33. عادل حجازى. قال:
    أكتوبر 22nd, 2009 at 22 أكتوبر 2009 12:19 م
    ابن البلد الجميل
    ههههههههههههههههههههههههههه
    بس على فكرة
    حكاية الشارع الضلمة ..لازم تكون بمزاج الواحد يعنى ؟!
    كتير بتبقى لازم تمشى فى شارع معين - اجبارى - وتلاقيه ..رومانسى
    ..حالم ..ظالم ..مظلم !!
    صح ؟!
    
34. عادل حجازى. قال:
    أكتوبر 22nd, 2009 at 22 أكتوبر 2009 12:20 م
    المجهول 18
    ربنا يكرم اصلك
    شكرا
    
35. عادل حجازى. قال:
    أكتوبر 22nd, 2009 at 22 أكتوبر 2009 12:21 م
    الفاضل / عادل سعيد
    20 حزب ..مع شعب أغلبيته فى حالة أمية …
    ولا ليهم ريحة اللازمة !!
    تحياتى .
    
36. عادل حجازى. قال:
    أكتوبر 22nd, 2009 at 22 أكتوبر 2009 12:22 م
    الاستاذ / ايمان
    ان شاء الله ..بكره أحسن
    تحياتى .
    
37. mona sawy قال:
    أكتوبر 22nd, 2009 at 22 أكتوبر 2009 7:28 م
    **طيب لو كل اللي قلته ده ..اتحقق عكسه
    ..ح تكتب في ايه يا عادل..؟؟الملل ؟؟
    أصل احنا خدنا على كده..و مستنيين المعجزة اللي غالباًً مش جاية..
    
38. monasoliman97 قال:
    أكتوبر 23rd, 2009 at 23 أكتوبر 2009 6:59 ص
    نسيت تقول
    إنك تلاقى واحد عنده القدرة يعدد العجايب دى كلها
    بجد كلام يستاهل المتابعة
    صباح السعادة
    
39. صفية صلاح قال:
    أكتوبر 24th, 2009 at 24 أكتوبر 2009 6:15 م
    ا/ عادل
    جميل جدا ان تحلم بالمستحيل يمكن قى يوم ما نلاقى الاحلام حقيقة وعلى رأى محمد منير لو بطلنا نحلم نموت
    تحياتى
    
40. رائدة زقوت(أم ليث) قال:
    أكتوبر 26th, 2009 at 26 أكتوبر 2009 5:15 م
    الراقي عادل
    مساء الخيرات
    رغم كل ما ذكرت تبقى مصر دار الجميع
    تحياتي
    

اكتب تعليــقك

الإسم الذي سيظهر على التعليق

مشتركي مكتوب

سجل دخولك

• مستخدم جديد..سجّل الان!
• تذكر كلمة السر

اسم آخر

« أول أسبوع فى الجامعة !!

عجائب الدنيا المصرية ( 2 ) ( مصر اللى مش ف دماغها ) »

 

من فضلك اترك تعليقاً..رأيك يهمنى

 
السلام عليكم و رحمة الله و بركاته

"لا يتحمّل مكتوب أيّة مسؤوليّة عن المواد الّتي يتم عرضها و/أو نشرها في مدوّنة مكتوب. ويتحمل المستخدمون بالتالي كامل المسؤولية عن كتاباتهم وإدراجاتهم التي تخالف القوانين أو تنتهك حقوق الملكيّة أو حقوق الآخرين أو أي طرف آخر."

Yahoo!‎ مكتوب . فيديو وكليبات . عالم المرأة . فن ومشاهير OMG!‎ . حلويات 2012 . الرياضة . الأخبار . عربني قصص قصيرة . بريد ياهو . العاب فلاش . اجمل الصور . حلمي أون لاين . تألقي . حلمي أون لاين . ‎بريد Yahoo!‎ . إيميل ياهو .

تسمع فيروز ؟!

هنا

Fairouz - best of