عجائب الدنيا المصرية ( 2 ) ( مصر اللى مش ف دماغها )
عجائب الدنيا المصرية ( 2 ) ( مصر اللى مش ف دماغها )
كتبهاعادل حجازى ، في 21 أكتوبر 2009 الساعة: 19:32 م
فى المواصلات ..
مترو الأنفاق:
** انك تلاقى شبابيك المترو مقفولة ..والتكييف شغّال !!
** انك تلاقى المترو ..فيه مكان للوقوف المحترم المناسب للكائنات الحيّة المسمّاة بالبشر !!
** انك تلاقى الناس واقفة طابور مستقيم ..بمنتهى النظام والتحضّر ..فى محطات النزول والطلوع ..وليس طبقا لنظرية لنظرية لكل فعل ..رد فعل ..مساوى له فى القوّة ..ومضّاد له فى الاتجاه !!
** انك تلاقى الستات فى عربية السيدات فقط !!
** انك تلاقى المترو ..ريحته حلوة !!
** انك تحس ان زجاج المترو ومقاعده اتغسلوا قبل كده فى يوم من الأيام !!
** انك ما تلاقيش حد فى المترو بيقرا فى المصحف بصوت عالى ..على أساس إن هوّ فى قريش ..وبيحاول يهدى الكفّار.. !!
**
انك ما تلاقيش عيّل فرحان بخيبته ..اقصد ..موبايله …وعمّال يلعب جيمز ع
الموبايل بتركيز.. لو ركّز نصّه كان نجح فى الثانوية العمياء بمجموع أكبر من مجموع اينشتاين فى الثانوى !!
** انك تلاقى حد بيقرا الجرنال ..بس فى صفحة غير الرياضة والفن والحوادث !!
** انك تلاقى حد بيقرا فى المصحف ..بصمت ..وخشوع ..ولا تشعر انّه بيراءى ..أو ..مستنى يشوف نظرة الانبهار والاعجاب من حد !!
** انك تلاقى حد ماسك كتاب غير المصحف ..أو ..الجرنال !!
**
انك تلاقى مجموعة شباب بيتكلموا مع بعض ..ومش مصرّين يسمّعوا المترو كلّه
موضوعاتهم اللى غالبا بتبقى تافهة ..وألفاظهم ..اللى غالبا بتبقى (….) !!
** انك ما تصادفش واحدة واقفة مع واحد ( صاحبها ..زميلها ..جارها ..قريبها …ما يشغلكش !!)
..وهاتك يا ابتسامات ساحرة – قال يعنى عاجبها قوى كلام الهفأ – وهى ّ
بتشاغل واحد تانى من تحت لتحت ..مسنتح عينيه عليها ..على أساس ان كل اللى
حواليهم فى البلالا !!
** انك تلاقى .شاب ..بالغ .عاقل..راشد ..ساب مكانه لراجل عجوز أو ست كبيرة عشان تقعد مكانه !!
**
انك ما تحسّش ان الراجل اللى بيقطعلك التذاكر ..وبتاع الأمن اللى على
ماكينة التذاكر ..و عامل النظافة ..وسوّاق المترو – لما تشوف وشه سريعا –
والمترو داخل على المحطة- …انك ما تحسش ان الناس دى كلها ..كارهاك ..وكارهة البلد ..والحياة نفسها !!
فى الميكروباص والمينى باص
** انك تلاقى ميكروباص جديد ..ونضيف فى وقت واحد !!
** انك تلاقى سواق ما بيسمعش جورج وسوف ..أو مصطفى كامل ..أو ..المطربين الشِعْبيين تِمّن !!
** انك تلاقى تبّاع ضوافره نضيفة !!
** انك تلاقى تبّاع مش لابس شبشب !!
** انك تلاقى تباع محترم !!
** انك تلاقى سواق وتبّاعه بيشتموا بالأخ والأخت بس ..مالهمش دعوة بالأب والأم …منتهى الاحترام يعنى !!
** انّك ما تسمعش هذه العبارات الخالدة :
( العربيّة فاضية ورا يا افندية !! ) = العربية بقت علبة سردين !!
( فيه كرسى فاضى على الكنبة اللى ورا !! ) = يعنى اقعد على حِجْر الناس اللى ورا !!
( شيل الشنطة اللى على الأرض يا أستاذ ..كده انت وقّفتلى الدنيا !! ) = يعنى مش عاجبك تشيلها ..يبقى حتتشتم وتتهزّأ !!
( سِنّة جنبك يا أستاذ ..الناس هتقع فى الشارع !!) = يعنى ما تسيبش ال 2 سنتيمتر اللى جنبك دول ..وكشكش نفسك فيهم ..ما تعملش مهم ..والّا ..حتتشتم برضو وتتهزّأ !!
( اللى نازل المحطة اللى جاية يقرّب ع الباب يا افندية !! ) = يعنى قوم نحرر نفسك ..ما تبقاش جبلّة ..عاوزين نركّب غيرك ..بقالك كتير مآنسنا !!
( مفيش فكّة خاااااالص يا أفندية ..احنا لسّه فى اول دور ) = يعنى لو ليك باقى ..ما تصدّعناش ..حاول تعمل نفسك نسيته !!
( اتفضلى يا عروسة !! ) = الزبونة صغيرة فى السن وشكلها دلوعة !!
( اتفضلى يا أبلة !! ) = فتاة جادة ومحترمة !!
( اتفضل يا أستاذ !! ) = أكيد ..شكل الموظفين !!
( اتفضل يا بيه !! ) = حد شكله مستحمّى !!
( اتفضلى يا حاجة !! ) = ست كبيرة محجّبة !!
( اتفضلى يا مدام !! ) = مش محجّبة !!
( اتفضلوا يا شباب !! ) = شباب ينفع يكون جامعى !!
( يا كباتن !! ) = ينفع يكون دبلومات !!
( يا نِكم ..!! ) = يا نجم يعنى !!..غالبا حد شكله صنايعى !!
** انك تلاقى ميكروباص ملتزم بخط سيره فعلا ..مش مقطّع الخط 3 و 4 مراحل ..كل مرحلة بأجرة !!
** انك تلاقى سواق علاقته بأمين الشرطة ليست ( ثريّة ) بما يكفى لتوطيد ال…..صداقة !!
** انك تلاقى سواق بيعامل عربيّته معاملة أرقى من معاملة العربجى لحصان الكارّو بتاعه !!
** انك تلاقى سوّاق مشغّل قرآن ..وساكت ومركّز ..وفاهم !!
** انك تلاقى سوّاق ما بيفكّرش فى ( العَجَل
) اللى هى العربيات بتاعت زمايله ..طول ما هو ماشى ..مين سابقه على الخط
؟!..مين محمّل اكتر منّه ؟!..مين بيكسب اكتر منّه ؟!..مين أحرف منّه فى
الليلة دى !!؟؟
فى الاتوبيسات
** انك تلاقى اتوبيس كل خمس دقايق وفاضى !!
** انك تلاقى ابواب الاتوبيس تُغلق تماما بمجرد امتلاء المقاعد !!
** انك تلاقى السوّاق والكمسارى ..لابسين حلو ..وبيحبوا بعض !!
** انك تلاقى سوّاق وكمسارى ما بيستنّوش اقرب فرصة لشتيمة الركاب ..والهيئة ..والبلد ..واللى عايشين فى البلد !!
** انك تلاقى الاتوبيس المكيّف ..مكيّف فعلا !!
** انك تلاقى اتوبيس ..صوت الموتور فيه مش شبه صوت جورج وسوف !!
** انك تلاقى اتوبيسات خاصة بالستات بس ..وأخرى للرجال فقط !!
فى القطارات
** انك تركب قطر مفيهوش فيران !!
** انك تلاقى حمّام يصلح لاستخدام نفس الفئران !!
** انك تلاقى الفرق بين عربيّات الدرجة الاولى والسبنسة ( الدرجة التالتة ) ..مش زى الفرق بين النادى الاهلى ..ومركز شباب عين الصيرة ..أو ..الفرق بين فيروز ..وبين تافهاء وهبى !!
** انك تركب قطر من غير ما يخرج بره القضبان ..على اقرب بلد ..كاسحا فى طريقه كل ما يقابله !!
** أو ..تركب قطر ..ونت مش خايف انّه حيولّع بيك !!
** أو..تركب قطر ..ونت عارف انّه مش حيعطّل 3 سنين ونت فيه !!
…………………
انتهى الجزء الثانى .
……….
Acc_adelhegazy@yahoo.com
ـــــــــــــــــــــــــــــــــــــــــــــــــــــــــ
التصنيفات : مصر اللى مش ف دماغها !!!, مقالات | أرسل الإدراج | دوّن الإدراج
19 تعليق على “عجائب الدنيا المصرية ( 2 ) ( مصر اللى مش ف دماغها )”
اكتب تعليــقكالسلام عليكم و رحمة الله و بركاته
تسمع فيروز ؟!
هنا
أكتوبر 22nd, 2009 at 22 أكتوبر 2009 7:22 ص
أولا : بص ياباشا اللى أنته كاتبه كله كلام جميل بس فى حاجات بعضها مبالغ فيها شويه وأنته عارف أنى بحبك وأحب أقولك رأيي بمنتهى الصراحه
ثانيا: أنا هحكيلك موقف حصل قدامى كان فى راجل عجوز ركب المترو وفى شباب قاعدين فقال لواحد منهم يابنى معلش أنا مش قادر أقف ممكن تقعدنى مكانك وأنا نازل قريب قاله معلش ياحاج أصل أنا رجلى فيها عين سمكه ومش هقدر أقف المهم واحد جدع قام واقف وقعده وخمس دقائق وركبت بنت جميله أو (مزه كما يقال )فالشاب اللى كان فى رجله عين سمكه خفت فجأه ووقف زى الأسد وقعدها مكانه طبعا الراجل بصله بصه غيظ وكتم فى نفسه وسكت وبعد شويه الراجل نزل والشباب دول قعدوا يضحكوا بهستيريه كأنهم عملوا عمل بطولى يستحق كل هذه السعاده
فقل لى بربك مثل هؤلاء الشباب ماذا تعملوا من دينهم أو من أبائهم أين إحترام الكبير وأين وأين و………
ولا حول ولا قوة إلا بالله العظيم
تحياتى ………….وتقديرى
أكتوبر 22nd, 2009 at 22 أكتوبر 2009 9:15 ص
سررت لزيارتك وتعليقك ، وأيضا نصيحتك.
وتشرفت بالتعرف على مدونتك المميزة ، وتلوت إدراجك أعلاه فنالت طريقة كتابتك إعجابي وإن باللهجة المصرية التي بات كل عربي يفهمها بل ويتقن التحدت بها.
ستتكرر زيارتي ، وأرجو أن يدوم الوصال .
في رعاية الله وصونه ، ودمت متألقا أخي .
أكتوبر 22nd, 2009 at 22 أكتوبر 2009 9:21 ص
اما ما ااخذه عليك انك ذكرت المصحف فى ثلاث مواضع اتفق معك فى اثنتين منها وهو ان يقرأ بصوت عالى وان يقرأ منتظر اعجابا او كذا ولكن لاتسوى ابدا بين القران والجرنال من جهه وانه يقرأ فى القران وهو ام الكتاب ولو قرأ متدبرا فيه كفاة واغناة عما سواه من جهة اخرى
جزاك اللة خيرا
احمد الحسينى
أكتوبر 22nd, 2009 at 22 أكتوبر 2009 12:28 م
جزاكم الله خيرا
وشكرا على محبتك لى فى الله
أَحَبَّك الله الذى أحببتنى فيه .
…………
وبالنسبة للقصة اللى حضرتك حكيتها
بجد
شىء قذر قذر قذر إلى أبعد الحدود
عموما
معلّش
الشاب السافل دة ..لازم لازم ..حيتعرض لنفس الموقف فى شيخوخته
لازم
داين تدان
……….
تحياتى الدائمة .
أكتوبر 22nd, 2009 at 22 أكتوبر 2009 12:30 م
فى انتظار تواصلك دائما
لك التحية
ولكل أهل المغرب
سلامى ..و..احترامى .
أكتوبر 22nd, 2009 at 22 أكتوبر 2009 12:42 م
القرآن لا يعدله كتاب فى الدنيا .
ولم أساو بينه وبين قراءة الجرائد - عياذا بالله
فقط
قلت
المواطن فى بلدى ..( إن )…واخد بالك …(إن ) قرأ فى وسائل المواصلات ..فلا يقرأ سوى فى المصحف ..أو..الجرنال
وقراءة القرآن .بهدف جمع الحسنات ..فضل..ونعمة ..وشرف..وبركة ما بعدها بركة
لكن
أين القراءة فى التفسير
فى كتب الفقه
فى كتب التاريخ
فى كل العلوم الشرعية
وكذلك
العلوم الدنيوية …
أين هو الطبيب الذى يخطف القراءة فى مجلة علمية رصينة
المحاسب الذى يقرأ كتبا تخص مهنته
وهكذا
فى كل هذه المهن
أين القراءة فى هذه المجالات ..؟؟؟!!!
لماذا لا يقتلنا الغيظ من هواننا العلمى ؟؟!
لماذا لا نغار من معدلات القراءة فى الغرب ؟؟!!
المشكلة يا صديقى
ان الذهن العربى يتخيل كل مطالبة بالاطلاع ..هى مطالبة بقراءة الروايات والقصص ودواوين الشعر والكلام الفارغ دة - كما يظن أغلبية الناس !!!
والمبررات جاهزة
يا عم احنا عارفين نتلفّت حوالينا ..دحنا بنخطف اللقمة بالعافية !
دحنا مربوطين فى ساقية !
هو يعنى اللى قروا خدوا ايه !!
إلى آخر القاموس اليائس البائس !!
نفس المواطنين الحلوين دول ..معندهمش مشكلة يقعدوا كأن على رءوسهم الطير أمام الشاشات
بالساعات
أمام مباريات الكرة ..والمسلسلات والافلام والاغانى ..وبرامج التوك شوز !!!!!!!!
…………
ربنا يرحمنا برحمته !!
أكتوبر 22nd, 2009 at 22 أكتوبر 2009 2:40 م
أكتوبر 22nd, 2009 at 22 أكتوبر 2009 7:27 م
اما الكلام المطابق بشدة هو فى المينى باصات الكلام ده بشوفه يوميا فى مينى باصات الجيزة وامبابة بالذات
أكتوبر 23rd, 2009 at 23 أكتوبر 2009 2:14 ص
ياعادل اعدل لاء مش هي دي مصر
___________________________
مصر حاجه تانيه ياعم الحج هي صحيح قاسيه علينا وقلبها حجر واحنا مش في دماغها
بس مش شويه شوارع مكسره وعيال حبيبه في الضلمه ولا اتوبيسات معفنه ولا عمدان نور مطفيه ….
بجد
مش عارف اقولك ايه
اول مره معرفشي اعلق علي ادراج
ابن لامؤاخذه
اللي وصفها عادل فوووووووق
أكتوبر 23rd, 2009 at 23 أكتوبر 2009 6:51 ص
شيمون بيريز رئيس وزراء بني صهيون اتصل بالرئيس رونالد ريجان قائلاً:
ما هذا الكلام الذى أسمعه عن إرسال عربى إلى الفضاء ؟
فقال له ريجان : أوه لا تغضب ياشيمون ، سوف نرسل إسرائيليًا فى المرة القادمة
فقال له شيمون بيريز: أنت لا تفهم يا سيدى الرئيس،
أنا لا أشكو بالعكس أنا “أهنئك”
ولكنى أسأل : لماذا تكتفون بواحد فقط ؟!
أكتوبر 23rd, 2009 at 23 أكتوبر 2009 1:55 م
رغم صورتها الغبريه..
ورغم الماضي المشرق والحاضر المطفي..
ورغم السياسة الكالحلة..انا بحب مصر..لأنها بلد بشعبها..
وشعب مصر شجاع.
وكلو نخوة..انا مره اعرفت مصريين وكنت بغربه وكانوا جدعان وأقوياء..
كنت أحس إنو دم الفراعنه فيهم أصيل بحق..
مصر بلد حلو..
بس يا ريت يكون حاضره حلو زي طيبه قلب شعبو
أكتوبر 24th, 2009 at 24 أكتوبر 2009 11:49 ص
تحياتي ومودتي
أكتوبر 24th, 2009 at 24 أكتوبر 2009 5:04 م
كل ما كتبته رأيته فعلا ماعدا القطارات والحمد لله لم ارى حادثه ولكن شفت فيها الفئران والشبابيك المكسرة فى عز البرد والمواعيد والحمامات البشعةورائحتها التى لا تطاق والزباله (سواء على ارضية القطار او فى المحطات )
لاتنسى شبابيك الميكروباص المقفولة فى عز الحر اما الاتوبيس لااعرف عنه شئ لانه لايوجد فى اكتوبر
المهم انت حطيت ايدك على الجرح ياترى العلاج ايه؟
تحياتى..
أكتوبر 24th, 2009 at 24 أكتوبر 2009 5:52 م
كنتم معي …
كالأشجار بكبريائها…
كالأقمار بعلوها…
كالرياح بعنفوانها…
أنتم با من حفرت اسماءكم في أعماقي..
أنتم يا من أضاء الزمان بمكارم أخلاقكم وافكاركم..
شكرااااااااااااااااااااااااااااااااااااااااااااااااااااااا لكم..
شكرا لإنكم كنتم معي.!
أكتوبر 24th, 2009 at 24 أكتوبر 2009 11:39 م
هذا هو تعليقى الأول والأخير فى هذا الموضوع .
كثيرا ما أنتقدت من يزور مدونات بها ادراجات غير لائقة ..وكتابة تعليقات تشجيع لمثل هذه الادراجات
حتى أننى كدت اخسر أكبر أصدقائى ..طاهر الصوفانى بسبب هذه القضية ..وبسسب ادراج ..رأيت عليه توقيعه ..معجبا بما قرأه !!
وسأظل أكررها
لكل أخت دون استثاء
ولكل أخ
الكلمة أمانة
والمجاملات .يجب أن تكون فى موضعها
وأعلم من تعليقاتك وادراجاتك مدى رقيّك وتهذيبك الجم
ولم انتظر اثباتات من أحد
لا آى بى ..ولا غيره
لأننى ..كما وصفت نفسى فى احدى اغنياتى
طول ايام حياتى ..ونا متعود امشى
دايما ورا احساسى ..اللى ما بيكدبشى !!
واحساسى دائما ابدا..هو الاشمئزاز من هذه الادراجات
والابتعاد تماما عن اصحابها
مهما جاءوا إلى مدونتى ..وسطّروا عشرات التعليقات !!
أخيرا
لك منّى كل التحية والاحترام
أنت ِ
وكل أخوات التدوين ..المحترمات ..الراقيات ..الفضليات .
……….
سلامى…و…احترامى .
/
/
/
فى الحقيقة كنت عند الأخت نجاح ورأيت تعليقك
عجبنى جدا أسلوبك ورؤيتك للحياه وإحترامك للقيم
صدقنى الواحد بيحاول أن يكون كما يجب وحتى لو غلطنا المهم ما نجاهر بالمعصية صح
انا حضرت عندك ويبدو اننى هكون معاكى رزل
ومش همشى
طابت ليلتك
وبردو مش همشى
أسعد الله جميع أوقاتك
وبردو مش همشى
أكتوبر 25th, 2009 at 25 أكتوبر 2009 6:46 ص
والدول الكبرى والصغرى-دون استثناء- تمارس انواع متعددة من الرقابة والتدخل والمنع على الانترنت
واغلب الدول ومها مصر اصبح لديها جهاز خاص للتدخل ف الانترنت
ولكن
وهنا العنصر الحاسم
هل صحيح ان تلك الدول تستهدف المدونيين
ام انها تستهدف استخدام النت لمنظمات العنف والارهاب وكذا لمحترفى النفاذ الى الماقع الحساسة للتجسس الامنى والصناعى والتكنولوجى وايضا لتخريب قواعد البيانات
فمواقع اجهزة الامن والدفتع والمواقع التكنولوجية والبنوك تتعرض لعدد هائل من الهجمات كما تسرى مليارات عديدة فى نشاطات كغسيل الاموال وتمويل الارهاب- كل هذا يسرى عبر النت
فى ظل كل هذا واكثر-ربما نكون بعيدين تماما عن الحقيقة لو تصورنا ان تهتم تلك الدول بمدوناتنا
وهل نحن المدونيين العرب نحب ان نعيش مثل تلك الاوهام
وحتى لو تصورنا انهم يريدون السيطرةعلينا
فلماذا عليهم ان يبذلوا كل هذا الجهد الهائل بحساب المنفعة والتكاليف -وما هو اصلا حجم ونوعية تاثير المدونات العربية فى المجتمع العربى
حجم التاثير ضعيف جدا ونوعيته ايضا
والا فليقل لى احدنا ما نوعية التاثير الفكرى والاجتماعى والثقافى والحضارى الذى مارسته المدونات العربية فى مجتمعاتها
اظن ان المدونيين العرب لم يقدموا شيئا فكريا هائلا يستدعى الدول لدفع اموال هائلة لا لكبت هؤلاء المدونيين لا حتى لشرائهم
بس احنا بنحب نتخيل لانفسنا دوراوكاننا قوات فى مواجهة قوات والمسالة فى صراع متعادل -ومن ثم تلجا الدول العظمى الى اعمال لا اخلاقية لترجيح كفتها
الحقيقة ان المدونات- على منافعها- لاتستطيع ان تدعى حتى الان انها حققت مواجهةحضارية وثقافية واجتماعية وفكرية وتكنولوجية- ناجحة مع خصوم المصالح -عبر العالم-التى اختارتهم المدونات كخصوم
ربما يكون نقص التاثير نابعا من عجز المدونيين وربما فى علاقتهم بالمجتمعات وربما فى عدم قابلية المجتمعات لهذا الاسلوب من حيث انها مشغولة او مش فايقة
ومن ناحية اخرى فلا نستطيع ان ندعى اننا قدمنا-حتى الان- عملا فكريا او حضاريا معمقا ومبدعا ومتجاوزا-بحيث ان تراكمه قدى يؤدى الى شئ
طيب فى مواجهة التحديات اللى احنا بنحب ان نتصورها- حقيقة ام مبالغة- كم من شعلنا فى المدونات يستحق ان يطلق عليه-كتابة
كم منه يستحق ان يقرا اصلا
كم منه يستحق ان يترجم
كم منه يستحق ان يطلع عليه بشر غير زملاءنا المدونيين المعلقين الدائمين اول زقزوءة الى تؤتؤ الى نعناعة
وهل توجد امة غيرنا اخترعت حكاية التعليق دون قراءة ماهو مكتوب
هل توجد امة غيرنا توافقت على ان تعلق- مااروعه- واحنا عارفين انه كلام فارغ
هل توجد امة اخرى بيحصل فيها تفحص شامل لاخلاق نجاح ابو الرب وغريب الدار من جمهور- مين دفع لمين فلوس ومين نام مع مين وده دكر ولا نتاية ومين عميل للموساد وده قال ومين عاد وماقال لى وقلت له ياعوازل فلفلواوابداعات اخرى لم تخطر على بال بشر غيرنا
هل يوجد مدونيين غيرنا كل مايشغلهم هو -انا حلو ومؤدب -حبونى ياجماعة وتعالوا علقوا عندى ونتبادل البعبعة
فاذا كانت الدول الكبرى ستشترى مكتوب فربما من باب الاطلاع والترويح عن النفس والضحك لا اكثر ولا اقل
فاغلب مانكتبه منقول ومسروق ياخواننا
واعظم مقالاتنا هى عن حذاء منتظر الزيدى وليست عن المفاعلات النووية ولا عن توسيع حصتنا من السوق الدولية ولا عن صراعات الامم فى الاستحواذ على النفوذ والقوة والهيمنة على الانترنت وغيرها من وسائل تحقيق المصالح الكبرى
احنا خارج المسالة خالص
لكنن بنحب نمارس الضجيج -بيننا وبين بعض-وكاننا بنشتغل واننا جزئ من صراع هائل- واحقيقة الامر اننا خارج الصراع
والمدون اللى عاوز يدعى انه جزء من صراع
عليه ان يكتب مقالات مبدعة ويعرض لافكار جاهدة كادحة وجديدة
هو ده اللى يقدر عليه المدون -ان يبدع
وهو ما نحب ان نتصور- انه سياتى بعدنا مدونون اخرون يقدرون عليه
ونحب ان نتمنى ان يكون العصر الذهبى للتدوين- ولنهضة الفكر العروبى ولاستنفار تحديث الفكر الاسلامى- ان تكون العصور الذهبية قادمة امامنا لا خلفنا
لان لو كان مافعلناه ده هو العصر الذهبى- تبقى مصيبة
أكتوبر 25th, 2009 at 25 أكتوبر 2009 2:52 م
أخي العزيز عادل
أعتذر عن طول غيابي
عايز أقلك أن أحنه مش على بال حكومة مصر وليست مصر
ولك مني خالص التحية
وجديدي ينتظرك
محمد فؤاد
أكتوبر 25th, 2009 at 25 أكتوبر 2009 4:05 م
في الاردن كما في مصر كما المغرب ,,,
التناسب طردي كلما طال الزمن كثرت المآسي ,,,
وكلما اقترب الناس الى السعادة فتحت ابواب المعاناة ,,
بالطبع هذا من حسن النوايا الطيبة ,,
والعاملين على راحة الامة والناس ,,,
الحمد لله على كل حال ,,,
لك تحياتي اخي ,,,
ديسمبر 22nd, 2009 at 22 ديسمبر 2009 8:43 م
ههههههههههههههههههههههههههههههههههههههههههههههه بص يا أفندى انت بمناسبه الأفنديه اللى كانوا فى اليكروباص، الموضوع يجنن فعلا موتنى من الضحك والصور اللى مختارها تموت من الضحك وخاصه صوره الميكروباص النضيف اللى أنت حاططها
دمك خفيف جدا وطريقتك فى الكتابه رائعه
لك أجمل وأرق تحيه
Rosittanita