حلقة لن تُذاع من برنامج شويّة عيال ” خواطر رمضانية “
حلقة لن تُذاع من برنامج شويّة عيال ” خواطر رمضانية “
كتبهاعادل حجازى ، في 12 أغسطس 2011 الساعة: 22:09 م
** اسمك ايه يا حبيبي ؟!
- عطوة ابراهيم السرنجاتي !!
** السرنجاتى؟!
- ايوة ..اسم ابويا كده !
** طب ودى جايه من سرنجة يعنى ..؟!
- ايوه يا خِفّة ..اصله بتاع حقن !
** مُمرّض يعنى ..تَمَرجى موش كده
- مشّيها كده عشان المباحث !!
** ونت بقى بتحب الطب زى بابا ..نفسك تبقى دكتور لمّا تكبر ؟!
- دكتورمين يا عم الحاج ..احنا لاقيين فلوس للاكل والشرب لما نلاقى للعَلام والمدارس !
** يعنى انت سبت المدرسة ؟!
- لأ..هىّ اللى سابتنى لا مؤاخذة ..ما اتّفقناش !!!
** طيب ..يعنى انت نفسك تطلع ايه لما تكبر ؟!
- اطلع على اليونان ولا ايطاليا …اشتغل ايتها حاجة اجيب فلوس ..وارجع ملك !!
** طب استنى استنى ..دة فيه خبر عاجل فى التيفزيون ..استنى نشوف حايقولوا ايه !!
“”
على الشاشة …المذيع الوهمى : جائنا البيان التالى : تم القبض على كل
المسافرين لايطاليا واليونان ..كما تم الغاء كل المراكب الشراعية فى البحر
المتوسط ..مع الاكتفاء بالجيت سكى فقط للترحلق على الأمواج …والله الموفق
والمستعان ..” !!!
** ايه ده …دول لغوا السفر لايطاليا واليونان وبيمسكوا كل اللى بيسافر ليهم !!!!!
- انت
فاكرنى عبيط ولا ايه !!…ومين الاهبل اللى فى التليفزيون دة !! وبعدين هة
فيه نشرة اخبار كده اساسا …وكمان المذيع ده موش مذيع اصلا ..دة الواد بتاع
موجة كوميدى …وطلع فى الف مسلسل ..وكمان فى الفيلم بتاع اسف على الازعاج
بتاعك !!!
*** !!!!!!!!!!!!!!
- يا نجم انا موش عيل صغير …انا كسّيب ويوميّتى عشرة جنيه فى اليوم..عيب تشتغلنى !!
** أنا آسف ..انا عارف ان انت كبير ..وكبير قوى كمان ..احنا كنّا بنهزر معاك ..بالمناسبة انت ساكن فين ؟!
- فى عزبة القرود !!!
** عزبة القرود ؟!
- آه ..موش عارفها …دي اللى صوّرت فيها سمية الخشاب حين ميسرة !!!!!!!!!
** طب ونت ايه رأيك فى سميّة الخشّاب ؟!
- مزّة طبعا …بيكو !!!
** طب بص ..بلاش نتكلم عن الفنانين عشان شكلك هتودّينا فى داهية !…ايه رأيك فى ثورة 25 يناير ؟!
- وقفت حال ابونا …لا عارفين نروح ولا نيجى والحالة بقت زفت …ناس عواطلية وبايتين فى الميدان ..عاوزين ايه موش عارف !
** يمكن عاوزين البلد تبقى احسن ..ونت تعيش احسن ..تتعلم وتكبر وتشتغل شغلانة كريمة وتعيش عيشة كويسة ..
- يا باشا بدل الكلام الفارغ ده ..ييجوا يصلحوا عندنا الميه المقطوعة ولا الشوارع البايظة ولا كوام الزبالة !
**ايوه .. بس ده دور الحكومة !
- يا
باشا كل حاجة فى بلدنا مالهاش دعوة بالحكومة !!…الناس بتلمّ من بعضيها
الفلوس وتركّب صرف صحى ..تركّب كهربا..يبنوا مدارس ..مستوصف …جنينة …مركز
شباب !!!…لكن كل واحد معاه قرشين حاططهم تحت البلاطة ومكبّر الجمجمة
…وبعدين يطلع يغنّى فى التليفزيون وهو فى
التحرير…الفقرا…الفقرا…الفقرا….بطّلوا اشتغالات بقى وارحموا ابونا !!
** يعنى انت موش مبسوط ؟!
- انبسط من ايه …ده حتى المصلحة بتاعت اركيديا مول لمّا فوّرناه ونفضناه …خلصت !!..وبقينا ع الحديد المجيد !!
** ايه ده ..يعنى انت سرقت اركيديا مول ؟!
- ما تقولش سرقت …قول خدت حقى !!
** حقّك ؟!
- ايوه حقى …الناس دي عملت فلوس ازاى اصلا ..موش من سرقة اللى زيى انا وابويا …الشعب يعنى !!
** مش شرط يعنى !
- ما نت لازم تقول كده ..انت موش كنت غلبان وبعدين بقيت نجم بتاخد ملايين !!
** هاهاها…ايه ياعم ..انت بتقُرّ عليّا ولا ايه ..انت من الضرايب ؟!
- لأ ..من الزرايب !
** طيب يا عطوة ..احنا خلصنا الحلقة خلاص ..بس قبل ما تمشى ..روح افتح الدرج ده
- فيه ايه يعنى الدرج ده ؟!
** هديّة ليك
- ايه هىّ يعنى ؟!
** ميكانو !
- ميكانو ؟! اعمله حجاب يا عبد السميع …فُتّك بالعافية !!!!
“” عطوة يترك الاستديو بينما احمد حلمى ينظر فى ذهول !!!!!!!!!! “”"
ـــــــــــــــــــــــــــــــــــــــــــــــــــــــــ
التصنيفات : خواطر رمضانية | السمات:لعب عيال, المباحث, احمد حلمى, برنامج شوية عيال, حجاب, شوية عيال, عزبو القرود
أرسل الإدراج | دوّن الإدراج
3 تعليق على “حلقة لن تُذاع من برنامج شويّة عيال ” خواطر رمضانية “”
اكتب تعليــقكالسلام عليكم و رحمة الله و بركاته
تسمع فيروز ؟!
هنا
أغسطس 12th, 2011 at 12 أغسطس 2011 10:30 م
أغسطس 13th, 2011 at 13 أغسطس 2011 4:43 م
يا خير ما اخترت لتستضيفه في البرنامج
صدق من قال شوية عيال
bravoooo
Ruba ahmed
أغسطس 15th, 2011 at 15 أغسطس 2011 3:04 م
كل عام انت بخير استاذ عادل
أجدت الاسقاط
وللاسف فإن ماذكرته هنا وأكثر لا يمكننا التبرؤ منه
دمت بكل خير
أغسطس 16th, 2011 at 16 أغسطس 2011 11:26 ص
الاخت ربا
الاستاذالفاضل عبد الحميد بشاره
………
احترامى ومودتى الدائمين
اشكركم